Перша асоцияция на поняце „йоґа” ми вше було же – то нє за мнє. Понеже сом длуги час була пошвецена вибудови мускулох, занягала сом часц вежбаня хтора ше одноши на їх фине формованє и розцагованє.
Mедзитим, провадзаци литературу хтора указовала на значносц розличних файтох рухох и концептох вежбаня за злєпшанє стабилносци цалого цела, одлучела сом пробовац цошка цо було комбинация важбаня у терховальнї, швидких тренинґох и елеґантних рухох. То була єдна файта йоґи хтору ше часто наволує и йоґа зоз терховальнї (анґ. gym yoga) т. є. пауер йоґа (анґ. power yoga).
Пауер йоґа постала популарна и без того же чи є точно дефинована як окремни концепт вежбаня, а причина то же така файта йоґи то комбинация вецей єй файтох. Попри тим, вельке число тренерох понука тренинґи такей файти, а саме вежбанє часто формоване спрам можлївосцох, потребох и способносцох самих вежбачох.
Основа т. є. корень пауер йоґи находзи ше у Аштанґи, алє и Виняси. Традицийна Аштанґа провадзи сериї истих позох у хторих ше остава пейц удихнуца и видихнуца пред тим як ше прейдзе на Винясу. Виняса значи рухи хтори провадзи синхронизоване диханє. Приклад за тото то рух з назву „поздрав слунку”. Рухи ше усоглашено зменюю и кажди рух провадзи диханє. Пре таке специфичне рушанє частa назва за сами вежби то „виняса цек”, або лєм „цек”. Понеже пауер йоґа то комбинованє позох и цекох, векшина рухох швидка, та таки тренинґи интензивни и за нїх потребне мац досц моци и кондициї. Єст даскельо хвильки кед акцент положени на триманя одредзеней пози, медзитим то нє тирва длуго, бо ше нєодлуга преходзи на нову позу, т. є. асану. Цело ше нєпреривно руша и през специфични рухи анґажую ше шицки мускули, а чежина зоз хтору ше вежба, то чежина свойого цела.
После тренинґа пауер йоґи чувствує ше звекшане количество енерґиї, алє и олєгчанє. То и найчастейша причина пре хтору велї людзе вежбаю пауер йоґу. Велї чувствую и опущеносц, як и змиреносц.
Tото цо можем повесц зоз особного искуства то же ме потераз нє прицаговала идея о стваряню енерґиї, або медитациї хтори ше часто споминаю у контекстох самого контекту вежбаня йоґи. То нє значи же ше у будучносци и тото нє пременї. Тото цо ме прицагло то чувство флексибилносци и лєпшого положеня цела, красше формовани мускули и, ґенерално, лєпше чувство у цалим целу. Позитивни резултати хторим сом ше нє наздавала то були лєпше триманє, зменшани болї у клубох и долнєй часци цела, и лєпши сон. Пауер йоґу сом з початку вежбала раз у тижню, а тераз у зависносци од потреби вежбам два раз, або аж и три раз у тижню. Тренинґи хтори виберам тирваю од 15 до 30 минути, а понеже су досц интензивни, длужей од того би була баржей терха як задовольство.
Жридла
www.popsugar.com/fitness/What-Power-Yoga-23531383
oneflowyogastudio.com/what-is-power-yoga-and-why-should-you-care
www.anamayaresort.com/power-yoga-benefits/
blog.codyapp.com/2013/06/19/power-yoga-benefits/