БЕОҐРАД – На Округлим столє „Беоґрадски зложни мозаїк”, котри отримани 2. марца у Беоґрадзе, а хтори бул пошвецени правом и положеню националних меншинох, Сузана Паунович, директорка владовей Канцелариї за людски и меншински права, визначела же барз важне же би локални самоуправи були у полней мири уключени до витворйованя правох припаднїкох националних меншинох.
Як Паунович наглашела, у предходним периодзе у вецей як 60 локалних самоуправох заняти прешли рижни обуки за потримовку и помоц гражданом у витворйованю меншинских правох.
Андрея Младенович, заменїк городоначалнїка Беоґраду, привитал присутних и у бешеди визначел же Беоґрад отворени город, у хторим ше жительство нє одредзує по националней припадносци.
-Сход „Беоґрадски зложни мозаїк” шведочи же Беоґрад ма одличне одношенє ґу представнїком совитох националних меншинох, алє и же шлїдзи политику Влади Републики Сербиї и Канцелариї за людски и меншински права. У тим смислу, таки конференциї и сходи барз важни за диялоґ и черанку искуствох, представянє и виношенє проблемох з котрима ше заєднїцки мушиме вибориц – гварел Младенович.
Иван Бошняк, державни секретар у Министерству державней управи и локалней самоуправи, потвердзел же нєодлуга будзе принєшени сет законох о меншинских правох з хторима би ше мали злєпшац условия живота меншинских заєднїцох. Вон додал и же тото цо ше роби у тей обласци да нови квалитет хтори Сербия принєше до Европи, а то медзиетнїчни диялоґ.
„Беоґрадски зложни мозаїк” орґанизовали Министерство державней управи и локалней самоуправи и Канцелария за людски и меншински права Влади Републики Сербиї у сотруднїцтве з Городом Беоґрад.
