НОВИ САД – Городоначалнїк Нового Саду Милош Вучевич, вєдно зоз министром за роботу, обезпечованє роботи, борецки и социялни питаня Зораном Дьоредєвичом, директорку Републичного ПИО фонду Драґану Калинич и директором Покраїнского ПИО фонду Славком Имричом, присуствовал на додзельованю пензионерских карточкох новосадским пензионером.
Вучевич поволал вецей як 72.000 пензионерох же би ше явели до филияли ПИО фонду у Новим Саду и превжали карточки, бо им вони олєгчаю функционованє и витворйованє бенефитох котри им припадаю як пензионером.
Вучевич з тей нагоди визначел же тото указує же держава, ресорне министерство и ПИО фонд водза рахунку о медзиґенерацийней солидарносци и же то нє лєм начално деклароване, алє представя сущносц политики од републичного по локални уровень.
Министер Дьордєвич визначел же Нови Сад други у Сербиї у котрим почал процес дзелєня карточкох за пензионерох котри Влада Сербиї будзе запровадзовац у цалей жеми. Вон додал же шицки пензионере достаню карточки, а же идея министерства же би ше порушала инициятия котра би подрозумйовала же кажда локална самоуправа обезпечи пензионером одредзени вигодносци и попусти.
Кед достаню карточку, старши гражданє як доказ же су пензионере вецей нє буду мушиц указовац пензийни чек, алє тоту функцию превежнє пензионерска карточка.
Карточки сукцесивно будзе вирабяц ПИО фонд и буду безплатни, а динамика їх друкованя утвердзена по општинох.