Перша награда Миклошевчанком, а специялна Кулянком

автор сас
1.2k Опатрене

ДЮРДЬОВ – На дюрдьовским традицийним 16. Фестивалє жридлового шпиваня „Най ше нє забудзе”, отриманим всоботу 18. авґуста, у валалским Задружним доме, Фахови жири за побиднїка преглашел Женску шпивацку ґрупу КУД „Яким Ґовля” з Миклошевцох, а специялну награду додзелєла Женскей шпивацкей ґрупи РКУД „Др Гавриїл Костельник” з Кули.

Присутних на програми привитал Желько Ковач, предсидатель Вивершного одбору Националного совиту Руснацох и Чедомир Божич, предсидатель Општини Жабель котри урядово отворел концертну часц Фестивалу.

У програми наступели штернац шпивацки ґрупи котри пестую жридлово шпиванє, а у змагательней часци дванац ґрупи з дзешец наших местох у Сербиї и Горватскей.

Перши, уж традицийно, наступели прешлорочни побиднїци – Женска шпивацка ґрупа КУД „Тарас Шевченко” з Дюрдьова. Потим ше на бини зменьовали шпивацки ґрупи – Мишана ґрупа КПД „Карпати” з Вербасу, Женска ґрупа КУД „Яким Ґовля” з Миклошевцох, Женска и Мишана ґрупа Руского КУД „Др Гавриїл Костельник” з Кули, Женска ґрупа КУД „Иван Котляревски” з Бикичу, Хлопска ґрупа КУД „Петро Кузмяк” з Нового Орахова, Женска ґрупа КУД „Жатва” з Коцура, Хлопска ґрупа КУД „Яким Гарди” з Петровцох з Горватскей, Дзивоцка и Хлопска шпивацка Руского културного центру з Нового Саду и Хлопска ґрупа Дома култури з Руского Керестура. У програми нє участвовала нашо Дружтва зоз Шиду у Суботици.

У ревиялней часци наступели два ґрупи – Женска ґрупа „Дюрдєвак” зоз Дюрдьова и оркестер „Гуцул” зоз соло шпивачами и компания зоз Ужгороду з України, чийо шпиваче и гудаци виведли венчик народних шпиванкох на українским язику.

Шицки учашнїки достали як дарунок стародавни древени фурик. Як и каждого року, на тему дарунка справена и сценоґрафия на котрей бул витерняк, а коло нього прави древени фурики з стародавнима полнима мехами зоз житарками.   

Медзи визначнима госцами на Фестивалє були привитани Олена Папуґа, посланїца у Народней скупштини Републики Сербиї, Душанка Джамбас предсидателька Совиту Месней заєднїци Дюрдьов, Мартица Тамаш, директорка НВУ „Руске слово”, Анамария Ранкович, директорка Заводу за културу войводянских Руснацох, Татяна Беук Латяк, одвичательна редакторка РТВ Редакциї на руским язику, Златица Няради, помоцнїца главного и одвичательного редактора РТВ програми за национални меншини на радию и о. Борис Холошняй.

Учашнїкох оценьовал Фахови жири у котрим були Татяна Колєсар Ґвоїч, Златица Няради, Миломир Шайтош и Юлиє Еделински, а пресидателька була Агнета Тимко Мудри.

Побиднїцка ґрупа на дарунок достала малюнок котри за тоту нагоду подаровала уметнїца Гелена Крклюш Фейди зоз Ґосподїнцох, а специялна награда була репродукция малюнка уметнїка Мити Пушкорова зоз Дюрдьова. Конферансу, котру написал Яким Чапко, водзели Кристина Горняк и Тарас Чапко.

Фестивал жридлового шпиваня „Най ше нє забудзе” находзи ше у Календаре репрезентативних манифестацийох НС Руснацох, а снователь и орґанизатор Фестивалу КУД „Тарас Шевченко” з Дюрдьова. Фестивал финансийно потримали Покраїнски секретарият за кулуру, явне информованє и одношеня зоз вирскима заєднїцами, Покраїнски секретарият за образованє, предписаня, управу и национални меншини-национални заєднїци, Национални совит рускей националней меншини, Завод за културу войводянских Руснацох, Општина Жабель и Основна школа „Йован Йованович Змай” зоз Дюрдьова.

После преглашованя побиднїкох друженє зоз нашу жридлову шпиванку и музику предлужене у просторийох и тирвало до самого рана.

Вецей фотоґрафиї можеце поопатрац у нашей фотоґалериї.

ПОВЯЗАНИ ТЕКСТИ