НОВИМ САД – Внєдзелю, 10. мая, у новосадскей грекокатолїцкей церкви Св. апостолох Петра и Павла, на Служби Божей, хтору служел парох о. Юлиян Рац, першираз ше причащали дзевецеро дзеци, хторих пририхтала вироучителька Мелания Римар, а то: Кристина Ковач, Надя Горняк, Елена Деметер, Лара Сакач, Мартина Фейди, Андєла Кривокуча, Матей Фейди, Владимир Папуґа и Никола Вукмирович.
– Зоз тима дзецми Исус будзе жиц, радовац ше и пребачовац им – гварел о. Рац. – Гоч би мал и цали швет, то нє сполнює потреби чловека, бо ше вон намага ґу животу и вичносци, а то му дава лєм Бог. Дзеци, нє забувайце и убудуце причасц, а родичи треба же би мали свидомосц же Христа треба нєпреривно баржей упознавац. Дзекуєм и вироучительки и винчуєм и родичом же приведли дзеци до Церкви же би прияли Исуса зоз святосцу и побожносцу – наглашел о. Юлиян.
Вон на концу подзелєл памятки на тоту вельку подїю, потим одслужени и молебен до шерца Исусового, а у церковней сали було аґапе.
