ДЮРДЬОВ – По перших, нєурядових податкох, у Дюрдьове на виберанкох за предсидателя Сербиї вчера, 2. априла, на пейц виберацких местох гласал 2 171 виберач, односно 51,59 одсто зоз 4 208 уписаних до виберацкого списку.
Найвецей гласи – 59,65 одсто достал Александар Вучич спред владаюцей коалициї на чолє зоз Сербску напредну странку, а на другим месце по освоєних гласох Лука Максимович спред ҐГ „Любиша Прелетачевич Били-Лєм моцно”, котри достал 9,72 одсто гласох виберачох котри вчера гласали.
На трецим месце др Воїслав Шешель спред Сербскей радикалней странки зоз 9,26 одсто освоєних гласох, а на штвартим Саша Янкович спред ҐГ „За Сербию без страху” зоз 7,78 одсто гласох.
Други кандидати достали спод 5 одсто гласох – Ненад Чанак 4,37 одсто, Вук Єремич 3,22 одсто; Бошко Обрадович 2,12 одсто, Саша Радулович 1,52 одсто, проф. др Александар Попович 0,37 одсто, а Мирослав Парович и Милан Стаматович по 0,23 одсто гласох.
Шицки 5 виберацки места у Дюрдьове були у ОШ „Йован Йованович Змай”, а нєправилносци на виберанкох нє було.
