РУСКИ КЕРЕСТУР – Перши дзень у новим школским 2017/18. року и у Основней и штреднєй школи зоз домом школярох „Петро Кузмяк” будзе на пондзелок 3. септембра. Основна школа того року будзе мац 246, а Штредня 236 школярох док 51 школяр будзе змесцени у доме школярох.
У найновшим школским будинку на 8 годзин рано треба же би пришли школяре трецей и штвартей класи Основней школи и штредньошколци дзе директорка Хелена Пашо Павлович привита штредньошколцох першей класи руского и сербского оддзелєня Ґимназиї як и школярох туристично-готелиєрского напряму.
До школского будинку Замок буду ходзиц школяре першей и другей класи Основней школи дзе маю присц тиж на 8 годзин, а першокласнїкох тиж привита директорка Школи. Школяре висших класох Основней школи першого дня до найновшого будинку школи маю присц на 12 годзин. За шицких то будзе и перши наставни дзень, а достаню и розпорядох годзинох.