НОВИ САД/РУСКИ КЕРЕСТУР – Шейсцме наймладши члени Столнотениского клубу (СТК) „Русин” з Руского Керестура внєдзелю, 10. септембра, у Новим Садзе участвовали на Ревиялним столнотенисерским турнире за дзеци, односно школярох од першей по осму класу основней школи, цо источашнє бул и їх перши змагательни турнир, дознава Рутенпрес од тренера СТК Драґана Ковачевича.
Ревиялни турнир отримани на новосадским СПЕНС-у за младих змагательох з цалей Сербиї. Бавело ше на 11 столох, а за СТК „Русин” ше змагали Матей Макаї (1. кл. ОШ), Иґор Фейди (3. кл. ОШ), Александар Шанта (4. кл. ОШ), Желько Шомодї (5. кл. ОШ, алє ше змагал з рок младшима), як и Матей Сабадош и Велько Шомодї, обидвоме школяре шестей класи ОШ.
Столнотенисере перше бавели по ґрупох у своїх катеґорийох, а потим на „главней табли” и Матей Макаї и Желько Шомодї вошли медзи осем найлєпших на турнире у своїх катеґорийох, док Александар Шанта медзи 16 найлєпших бавячох у своєй катеґориї.
Як гварел Ковачевич, турнир у Новим Садзе, як и наступни на соботу у Бачкей Тополї, представяю пририхтованя тей новей ґенерациї керестурских столнотенисерох за службени бодовни турнири, хтори почню у октобру.
Тренер столнотенисерох тиж наглашел же спонзоре одходу младих змагательох на турнир до Нового Саду були їх родичи, котри плаца и котизацию за участвованє на ревиялних турнирох.