Перши раз палєнє бадняка и у Керестуре

автор зам  фото фейсбук
1.1k Опатрене

РУСКИ КЕРЕСТУР – На Вилїю по юлиянским календаре, пияток пред вечаром и у Руским Керестуре орґанизовани традицийни обичай Сербскей православней церкви – палєнє бадняка.

То вироятно перши раз же и у Руским Керестуре орґанизоване палєнє бадняка, а на Вилїю го орґанизовали Серби котри жию у Руским Керестуре, зоз своїма фамелиями.

У присустве коло 30 Керестурцох, обряд палєня бадняка у центре Керестура, опрез Мензи (погосцительного обєкту „Код Чава”) предводзел священїк Сербскей православней церкви з Кули о. Борислав Тошич. Попри тим же обезпечели дубово древо, домашнї за тоту нагоду пририхтали и традицийну чесницу, дзецом подзелєни дарунки, а после того предлужене кратше вешелє з музику. Як Рутенпрес дознава од єдного з орґанизаторох, планую же би палєнє бадняка убудуце и у Руским Керестуре постало традиция.

На Вилїю по юлиянским календаре бадняк того року палєни у шицких местох у кулскей општини, а тоту подїю знїмала и преношела и локална ТВ „Ку-медиа”.

Бадняк (дубово древо, конари) у Сербскей православней церкви представя символ древа хторе, по усней традициї, пастире принєсли Йосифови и Мариї же би розложели огень и зограли пещеру у хторей народзени Исус. Бадняк ше палї пред шветом и гори по Крачун, кеди ше обявює радосц Христового народзеня.

10-Badnjak-02

ПОВЯЗАНИ ТЕКСТИ