Повязаносц Руснацох з Марию

автор аба
965 Опатрене

МИКЛОШЕВЦИ (ГОРВАТСКА) – На швето Рождества пресвятей Богородици по григориянским календаре, на Малу Матку Божу, у Миклошевцох пияток, 8. септембра преславене храмове швето – Кирбай.

Архиєрейску Службу Божу предводзел крижевски владика кир Никола Кекич, а сослужели нашо священїки з Горватскей – о. Владимир Маґоч, о. Владимир Седлак, о. Олеґ Закалюк и домашнї парох о. Яким Симунович, як и зоз Сербиї – о. Владислав Варґа, о. Михайло Режак и о. Владимир Еделински Миколка. Споведал о. Маґоч, Апостол читал миклошевски дзияк Тонко Лїкар, а Євангелию о. Владимир Седлак.

7-Miklosevci-02

У казанї владика Кекич бешедовал о Марийовим живоце и єй пошвеценосц Господу Богу, а окреме наглашел же при Руснацох обачлїва окремна повязаносц з Марию, бо кед ше Руснаци з Бачкей приселєли до Петровцох и Миклошевцох, обидва церкви хтори ту збудовали пошвецели Богородици – у Петровцох Покрову Пресвятей Богородици, а у Миклошевцох Рождеству Пресвятей Богородици.

Кир Никола наказовал по руски и по горватски, а наявел же до єшенї Миклошевчанє достаню нового пароха. Подзековал парохияном и шицким котри ше модля за о.  Якима Симуновича, котри пре хороту ма одредзени почежкосци у службованю, як и самому парохови на його роботи.

На концу Служби Божей парох о. Яким Симунович подзековал владикови, священїком и шицким котри возвелїчали швето, а Кирбайска Архиєрейска Служба закончена з одпустовим обходом коло церкви и читаньом Євангелийох, як и шпиваньом Многолїтствия и владиковим благословом.

По числених автох хтори пред вечаром могло видзиц по валалє, Миклошевчанє на Кирбай мали и надосц госцох, алє векшином аж после роботного часу.

 

 

ПОВЯЗАНИ ТЕКСТИ