Кажда власц, та и актуална, ма даяки свой печац, дацо свойо окремне, дацо по чим, медзи иншим, будзе зпаметана. Так СПС-ова за велїх до конца живота останє асоцияция зоз войну, гиперинфлацию, кризу и подобне. ДОС-ова останє символ препущеней нагоди, розчарованя и так далєй. Велї подобни чувства маю и спрам ДС-овей. Цо ше дотика тих актуалних, ище вше нєт часовей дистанци и можлївосци же би ше видвоєло єдно чувство, лєбо асоцияция, алє у тим гаосу хтори нам сервирую тераз ме єдна ствар окреме цикави – политични дискурс хтори типични праве за напреднякох, без огляду чи ше волаю СНС, чи СРС.
Як перше, на живци ми идзе способ на хтори водза диялоґ, кед же ше то вообще може волац диялоґ. Вше ме учели же кед зоз даским водзим даяку розправу, мушим го вислухац и арґументовано одвитовац. Значи, лєбо даш одвит на питанє хторе ци поставене, лєбо зоз арґументами побиваш гевто цо дахто други твердзи. При напреднякох тото нє барз важи. Кед им одвитує же би дали одвит на питанє, а то углавним теди кед ше им опитаю дацо зоз чим ше можу хвалїц, вец су коректни и одвитую на питанє, алє кед поставице даяке цикаве питанє, идзе критика у смислу „за кого ви робице”, лєбо подобне. Одвитує ше зоз питаньом, цо значи же ше нє одвитує, лєбо комбинация типа „а они су” и подобне.
Далєй, маю манир же би увредлїво бешедовали о гевтих зоз хторима ше нє складаю. Миле, кед маш дацо повесц, критиковац, гоч цо, дай арґументи, а нє чвиринкай зоз виявами типа „пиштольджия”, „лоповска коалиция”, „плячкашки лоби” и подобне.
О плюваню по гевтих хтори нє ту, ускакованю до слова и других прикладох нєкултури и одсуства основного восипитаня нє сцем анї писац, верим же кажде зоз вас патрел пренос Скупштини, видзел голєм єдно сообщенє, провадзел пренос конференциї за новинарох.
Розумим же политична борба оштра, ясне ми же нєт милосци, же ше идзе з „джоном”, як гваря Серби, алє нє можем похопиц як себе дахто може допущиц же би ше спущел так нїзко и поґажел власне воспитанє, общу културу, даяки норми хтори у цивилизованим швеце єдноставно – норми. Система вредносцох нам и так уж розбита, нє постої, и думам же би гевти хтори нас водза, за хторих векшина гражданох гласала мушели водзиц рахунку о тим цо и як вигваряю прето же тот модел справованя и бешеди хтори актуални на концу нє принєше нїч добре. Напроцив, думам же лєм помогнє дальшому розпадовaню и так знїщеней общей култури. А тото нам наисце, на шицки „трапези”, нє треба.
Становиска висловени у тим тексту виключно авторово и нє вше одражую ушорйовацку политику новинох „Руске слово”.