Польопривредни пензионере можу придац вимогу за доставанє розлики у пензиї

автор зам
953 Опатрене

РУСКИ КЕРЕСТУР – У Руским Керестуре, и у других местох, заинтересовани польопривредни пензионере прейґ овласценого адвоката можу придац вимогу за доставанє розлики у висини пензиї.

Слово о тим же спрам скорейших одредбох закона, хтори важел три роки, було одредзене же минимална польоприврдна пензия може буц 13 000 динари, медзитим, векшина теди нє доставала тоту суму, алє коло 9 000 – 10 000 динари.

Прето єдна адвокатска канцелария з Нового Саду порушує поступок же би ше до компетентних орґанох послало вимогу за доставанє розлики по ґарантовану польопривреду пензию у тот час и поволує польопривредних пензионерох котри доставали менєй як 13 000 динари, же би у тим участвовали.

Заступанє адвоката пред державу безплатне, а придаванє потребних документох идзе прейґ орґанизацийох здруженьох пензионерох, та так и у Месней орґанизациї пензионерох у Руским Керестуре.

Польопривредни пензионере маю дац подписану полномоц адвокатови же би их заступал, а уж порихтани формулар за тото достаню у Здруженю пензионерох. Потребне и Ришенє о припознаваню (доставаню) пензиї, єден чек од пензиї, та фотокопия особней леґитимациї за тих котри маю стару, лєбо нову без електронского чипу. Хто ма леґитимацию з чипом, треба ю одчитац.

Полномоц нє муши буц оверена у матичара, а шицки потребни информациї и формулари заинтересовани польопривредни пензионере за придаванє тей вимоги достаню у рускокерестурским Здруженю пензионерох (односно здруженьох у других местох).

ПОВЯЗАНИ ТЕКСТИ