Младежска емисия „Останьце нашмеяни”, хтору ше емитовало на Радио Новим Садзе, окрем интересантних темох, була препознатлїва и по тим же ю водзели Два Санї. Од октобра прешлого року, тота емисия достала нову екипу и другу назву – „Емисия за младих”. У тим составе Лидия Костелник и Андрей Орос зоз Руского Керестура, Тамара Салаґ зоз Дюрдьова и Єлена Дудаш зоз Коцура. Як вони сцигли на тото место, хтори теми обрабяю, алє и велї други цикави ствари пречитайце у шлїдуюцих шорох.

Нова младежска емисия пременєла свой час емитованя и ма два термини, премиєрно – стреду вечар од 21.30 годзин, и репризно, ютредзень – штварток од 12.30 годзин, на Радио Новим Садзе, на 100, 92 и 107.1 MHz.

– Жадали зме ше приблїжиц ґу слухачом, понеже нам млади часто гуторели же им прешли, пополадньови термин нє одвитовал. Пременєли зме и назву емисиї же би нови водителє постали препознатлїви сами по себе, а яка будзе будучносц мена „Емисия за младих”, то увидзиме. Же бим здогадла читачох, емисия „Останьце нашмеяни” з початку ше волала „Одгуки з ровнїни”. Моя колеґиня, Саня Маркович и я, на концу емисиї, у програми, додавали останьце нашмеяни, так вец и настала назва младежскей емисиї – толкує Саня Дивлякович, хтора тераз редакторка емисиї „Емисия за младих”, а помага єй и Александра Живкович Бучко. Їх робота же би зоз нову екипу були у догварки о темох хтори ше будзе обрабяц у емисиї, направиц розпорядок, а потим препатриц тот материял. Уча и помагаю им коло монтажи, алє и „ускакую” вшадзи дзе треба. Уведли и нову рубрику „Технолоґ и я”, хтору обдумує Александра, а нова екипа зазберує материял, односно сообешеднїкох.

– То рубрика, ґенерално о технолоґиї, о сучасносци, ґеджетох, апликацийох. Заступени совити и нови информациї о технолоґиї. Тота рубрика єдно ошвиженє у емисиї – гвари Александра.

Нови водителє приходза зоз вецей руских местох, направена ровновага и намагаю ше облапиц шицки информациї хтори ше дотикаю младих. Теми робя по догварки, алє и по местох одкадз приходза. Вони штверо робя як волонтере и таки маю и подписани контракти.

– Вони можу робиц як волонтере, єден час, и шицко то супер, бо ше роботу научи, алє то анї нє треба же би тирвало длуго, прето же нєшка часи иншаки… вецей нє досц тото цо ше достанє од родичох, же би ше вижило у Новим Садзе. Треба випочитовац їх намаганє – толкує Саня.

СТУДИО ИМ НАЙЦИКАВШИ  

Млади особи хтори предлужели водзиц и твориц емисию за младих, ходза на факултет и активни су члени у рускей заєднїци. Тамара и Лидия студираю на Филозофским факултету у Новим Садзе, на Оддзелєню за русинистику, и обидва су на другим року. Андрей студент першого року на Журналистики, тиж так на Филозофским факултету, а Єлена штварти рок на Пейзажней архитектури на Польопривредним факултету. На авдициї хтора була орґанизована у мено рускей редакциї на Радио Новим Садзе у януару 2016. року участвовали Андрей и Лидия, и мали позитивни резултат.

– Ґу жирию зме уходзели єдно по єдно, покус сом мала трему, алє тото искуство випадло як барз фине. Тераз сом першираз у контакту зоз радийом и писаньом, алє одмалючка сом активни рецитатор, водзела сом конферанси, ґлумела, часто сом давала вияви за радио, та сом знала як то випатра – гвари Лидия.

Андрей тиж одмалючка присутни у медийох. Водзел телевизийну емисию „Дзецински швет”, рецитовал и ґлумел, а тиж так водзел и водзи конферанси на даєдних руских фестивалох.

– Обовязки на факултету конциповани так же мож ускладзиц шицко, и активносци з вонка, алє и на факултету. Мнє то барз вельки плус, як учим теорию, так ю применюєм у пракси – приповеда Андрей.

Тамара и Єлена ше по першираз стретаю зоз новинарску роботу. Тамара гвари же достала нагоду пробовац и приключиц ше ґу младим новинаром и пачи ше єй як шицко функционує. Єлена затераз сотруднїк, пре обовязки на факултету, алє им помага кельо може коло реализациї емисиї, преноши збуваня зоз Коцура, прето же є активна у здруженю младих КУМ. Новим водительом найцикавши студио, а заш, гваря же им и у редакциї приємно и опущено.

– Приключела сом ше остатня. Вони пришли предо мну и вецей уж знали, научели, и обавала сом ше же ше нє знайдзем и же будзем за нїма пожнїц. Тераз сом уж шицко звладала, вше мож виштригнуц, вимонтирац и вец шицко одлично звучи – гвари Тамара, хтора тиж активна у дюрдьовским Културно-уметнїцким дружтве „Тарас Шевченко” и упозната є зоз младежу и єй активносцами, та є так упуцена до интересантних темох.

У емисиї ше намагаю направиц ровновагу и облапиц рижни теми. Дознали зме и же им емисиї преполни, дакеди аж маю и мало музики, бо нє сцигую положиц вецей, од шицких информацийох и приповедкох. Младежска емисия динамична, дзекуюци младим хтори постали барз активни. Нєшка дружтвени мрежи оможлївюю сцигнуц ґу розличним людзом, дознац велї розлични податки и направиц цикаву приповедку. А же мож злучиц два файти роботи, шведочи и Єлена.

– Моя наука и новинарство вообще нє блїзки, алє кед ше сце, мож то витвориц шицко. Треба ше лєм пренайсц, а и мнє ше пачи така робота – толкує Єлена.

МОЖ СЛУХАЦ И ОДЛОЖЕНО

Емисию мож попровадзиц и на одложеним слуханю, уж треци рок емитованя младежскей емисиї, вона ше находзи и на сайту. На початку мали коло 30-40 препатраня, а од прешлого року вецей як 100, та и до 300.

– Пред кажду емисию на Фейсбук боку ше напише наяву, „таґую” ше шицки госци хтори участвую, а накадзи ше емисию положи на одложене слуханє, до того истого коментара ше кладзе и линк – закончую Саня и Александра, и надпоминаю же би шицки требали чуц яких успишних младих єст, а же вони направели супер тим хтори ше будзе намагац приповедац фантастични приповедки.