БЕОҐРАД – Реґионални интернет-портал специялизовани за провадзенє процесох европских интеґрацийох жемох Заходного Балкану „Europian Western Balkans” (EWB), прешлого тижня представел свойо сербске виданє, фокусироване лєм на Сербию, а роби на веб-адреси www.europeanwesternbalkans.rs.
Одвичательни редактор порталу Неманя Тодорович Штиплия потолковал же трецина гражданох Сербиї процив членства у Европскей униї, док 50 одсто нє сиґурни чи Сербия дакеди постанє членїца Униї.
– Думаме же то и пре нєдостаток информацийох о бенефитох хтори нам дава членство у ЕУ, алє и о бенефитох хтори приходза з реформами у процесу придружованя. Прето то главна мисия порталу – гражданом, заинтересованей явносци и медийом приблїжиц тот процес – гварел Штиплия.
Вон додал же EWB уж три роки обявює тексти и анализи на анґлийским язику, а з помоцу Амбасади Шведскей у Сербиї, тексти тераз и на сербским язику.
Шефица Прегваряцкого тиму Сербиї Таня Мишчевич наглашела же EWB портал дава найконкретнєйши и найдиректнєйши информациї вязани за европски интеґрациї нашей жеми, нє лєм у Сербиї, алє и у реґионє и з Бриселу.