Порученя у дунчику

автор Сенка Иван
1.3k Опатрене

После закончених студийох за воспитачку у Суботици, Оля Русковски зоз Коцура нашла способ як креативносц хтору ма у себе мож найлєпше вихасновац, потамаль док нє найдзе роботу у фаху, цо наисце жада. Почала правиц украсни дунчики, наполнєти зоз мотивацийнима порученями.

Сама ши шицко здумала, чи ши нашла даґдзе инспирацию?

Оля Русковски: Шицко рушело спонтано. Барз любим читац и у єдней хвильки сом почала записовац мотивацийни виреченя зоз кнїжкох. За таке дацо ме инспировал Пауло Коельо, його кнїжки найвецей и читам. Записовала сом надосц и вец сом у єдней кнїжкарнї видзела дунчик, кущик украшени. Так ми пришла идея, же чом би даяки украшени дунчик, на ориґинални способ, нє бул виполнєти зоз таку файту порученьох. Єден дзень сом буквално шедла, преробела ми инспирация и креативносц, и… почала робота. :)

1 IMG_1117_640x960Шицки порученя вицагуєш зоз кнїжкох, чи даєдни пишеш и сама?

ОР: Найвецей зоз кнїжкох. Медзитим, тераз мож надосц мотивацийни виреченя найсц и на интернету, та кед наидзем на даяке хторе ме наисце дотхнє, запишем и його.

Кельо ци на початку требало уложиц до роботи?

ОР: Нє требало тельо вельо укладаня, кельо наздаваня же то шицко руши и зажиє. Потребна єдна часц за декорацию, рижни паперики на хтори ше пише порученя, койдзеяки пантлїчки и подобне… И, нормално, дунчики, рижних фурмох и велькосцох. Финансийно нє треба вельо, а наисце ше намагам же би кажди дунчик бул ориґинални и иншак поробени як гевтот пред нїм.

Шицко робиш сама, чи маш и помоц?

ОР: З початку сом робела сама. У єдней хвильки сом мала вельо поручени дунчики, та ми пришла помагац Андреа Новак. Нє лєм же ми помагала, алє и фотоґрафовала шицки дунчики, и прето єй можем подзековац, бо их наисце барз крашнє приказала през фотоґрафию, за цо я нє схопна. Андреа тераз ма други обовязки, та сом предлужела сама. 

Чи дунчики виполнєти лєм зоз порученями, чи и зоз даякима декоративнима предметами? То шицко по жаданю купца? 

ОР: Перше ше намагам вислухац особу хтора одо мнє наручує. За хтору нагоду дунчик, хторей особи, чи ма даяки жаданя,  и фарбу може виберац у якей сце же би ше поробело… Дахто уж точно зна як ма дунчик випатрац кед навола, а дахто лєм пове „По твоїм виборе”. Вец я  поставям найвецей питаня о особи хторей идзе дунчик, же бим у складзе з тим могла написац адекватни порученя. Патрим же би було и декорациї и порученя, алє сущносц и акцент на порученьох.

IMG_0079_1280x853За яки нагоди мож поручиц таку файту дарунка?

ОР: Наисце за рижни и за кажди. За родзени дзень, дипломованє, рижни рочнїци, Дзень залюбених, 8. марец… аж и за найобичнєйши, каждодньови дзень, кед сцеце нєсподзивац милу особу. Мотивацийни порученя єст наисце за кажду нагоду.

Кельо ци часу треба же биш направела єден дунчик?

ОР: Завиши од велькосци дунчика и кельо порученя станє до ньго. Наисце у тим уживам, виполнює ме тота робота и гоч сом у якей  гужви, каждому ше пошвецуєм як кед бим мала лєм тот єден єдини. Одприлики ми треба дзень-два зоз шицкима пририхтованями.

Дзе мож поопатрац дунчики хтори ши направела и як ше руша їх цена?

ОР: Вєдно зоз Андреу, мам направени Фейсбук бок „Креативни кутак Алиса у земљи чуда” и ту можеце видзиц шицко цо сом потераз направела. Цена од 250 до 500 динари, завиши яки дунчик. Од самого початку сом нє сцела класц високу цену, лєм сом тераз уруцела вецей файти дунчикох, та тераз окрем обичней фурми мам и у фурми шерца.

IMG_0004_1280x853Як коментарую людзе кед видза таки дарунок?

ОР: Наисце позитивни и нє можем вам описац як ми мило кед особа хтора достала дунчик, хтори сом за ню направела, одушевена и нєсподзивана зоз нїм. Буквално ме людзе волаю же би ми подзековали. Феноменалне чувство.

Маш напредок порихтани дунчики, чи правиш лєм по наручбини?

ОР: Лєм по наручбини, прето же кажда особа окремна и намагам ше же би кажди шлїдуюци дунчик иншак поробиц. И то способ кед можеце подаровац дакому єдинствени, ориґинални дарунок.

Плануєш прешириц роботу?

ОР: Тоту роботу робим дас рок и ещи вше можем повесц же то, голєм затераз, гоби. Но, увидзим, кед шицко будзе исц и далєй добре, хто зна… Идеї мам надосц и вше ми нови приходза, так же о тим ше нє старам, а за друге увидзим. :)

Фото: Андреа Новак

ПОВЯЗАНИ ТЕКСТИ