ДЮРДЬОВ – Позвчером опрез главного уходу до будинка Културно-уметнїцкого дружтва „Тарас Шевченко” у Дюрдьове поставена нова метална конструкция зоз закрицом. Домашнї окреме думали о тим же ше на тим месце буду дружиц з госцами под час Фестивала жридлового шпиваня „Най ше нє забудзе”, котри будзе отримани 18. авґуста, та конструкция за таку намену и обдумана.
Пред трома тижнями майстрове орипали и обилєли вонкашнї мури, а потим шицки котри мали дзеку приключели ше ушорйованю простора опред будинка Дружтва. Двор з бехатоном преширени, а поставена и метална конструкция на котру стреду поставени лексон котри спонзоровал Юлиє Еделински з Петроварадину. После Фестивалу у планє поставянє огради и цивох за дижджовку на нове закрице.
Простор опрез дюрдьовского Дружтва ушорени дзекуюци роботнїком волонером и спонзором – Юлиє Еделински, Любка и Славомир Тиркайла, Маринко Дудаш, „Чакара промет” доо, Мирослав Мудри, Моника Брукнер, Звонко Мудри, Дюра Бучко, Месна зєднїца Дюрдьов и Драґан Раданович. За нїх, як и за шицких добредзечних роботнїкох, члени УО Дружтва прешлей стреди пририхтали друженє и вечеру под новим закрицом.
