На схадзки Церковного одбору у Новим Садзе розпатрене предкладанє Союзу Руснацох Українцох Сербиї же би ше поставело памятни плочи визначним особом: у церковней и парохиялней порти.
О тим предкладаню кратку информацию дал парох новосадски, о. Юлиян Рац, а дополнєл предсидатель Цекровного одбору Борислав Сакач. Потим тота точка дата на дискусию у котрей участвовали присутни члени Церковного одбору, же би на концу принєсли одлуку, дознаваме од предсидателя Церковного одбору Борислава Сакача.
Одлука глаши же памятни плочи котри би ше могло поставиц у церковней порти ше можу одношиц лєм на церковни, пошвецени особи. Плочи би ше поставело на одвитуюци метални ношачи. Предложене же би ше так поставело на першим месце два памятни плочи на котрих би була кратка история нашей церкви. Святих Апостолох Петра и Павла, и то так же би на боку котри обрацени ґу улїчки Светозара Милетича то було написане на сербским и анґлийским язику, а на боку котри обрацени до двора, би тото исте писало на руским и українским язику.
На другим месце би була поставена плоча о. Йованови Храниловичови, а на трецим месце плоча о. Романови Мизови.
Памятни плочи котри ше одноша на визначни особи зоз цивилного животу нашей парохиї ше може поставиц на мурик зоз нукашнього боку парохиялней порти до будуцей Алеї визначних особох док ше за тото обезпечи, насампредз физични условия, а потим и дефиную критериюми за одлучованє же котри ту особи буду визначени. Церковни одбор ше у тей хвильки стримує од вибору и даваню простора предложеним особом, бо ше нє чувствує як компетентни за приношенє такей одлуки. Наприклад, учитель Михайло Ковач препровадзел велї свойо творчи роки у Новим Садзе и напевно допринєсол културному животу шицких Руснацох и могол би мац место у новосадскей Алеї визначних (лєбо у месце дзе є народзени), док Янко Сабадош препровадзел свой цали роботни вик у Беоґрадзе, нє бул член нашей парохиї, та би швечело же би вон бул визначени на беоґрадскей, лєбо у дюрдьовскей парохиї, там дзе є народзени.
По тим питаню ше пошлє допис Националному совиту же би ше при Одбору за културу оформело фахови пододбор котри би ришовал таки питаня же кому и дзе би требало поставяц нє лєм памятни плочи, алє и други файти памятнїкох, бистох и скулптурох, нашим визначним културним дїячом по шицких наших местох, насампредз пре отримованє традициї и оддаваня почесци. Предкладаня би до того пододбору посилали поєдинци, ґрупи, орґанизациї и други заинтересовани, направело би ше лїстину, а вец би ше спрам финансийней ситуациї предкладачох и других заинтересованих спонзорох приступело ґу реализациї. Подобни допис ше пошлє и на адресу Заводу за културу войводянских Руснацох, з тим же би ше ту оформело фахову комисия (историчаре, подобово и други уметнїки,…), котра би до конца могла координовац зоз цалу тоту роботу, гварел нам Сакач.
КОЛО ВАЛЯНЯ/МУРОВАНЯ ОБЄКТОХ У ЙОВАНА СУБОТИЧА 8
Кратки звит зоз двох схадзкох котри отримани у априлу и маю мешацу того року зоз представнїками Будовательного подприємства „Artec group” DOO, поднєсли парох, о. Юлиян Рац и предсидатель ЦО Борислав Сакач. По оконченей дискусиї у котрей участвовали присутни члени Церковного одбору, принєшена одлука же ше чека на конкретне писмене комерциялне понукнуце спомнутого подприємства, котре до нєшкайшого дня нє пришло на нашу адресу, а на обидвох схадзкох було бешеди о контракту котри вони мали направиц и понукнуц на розпатранє. У тим смислу, же би ше пошвидшало процес, наша парохия напише допис и будзе глєдац понукнуце од спомнутого подприємства.
СОТРУДНЇЦТВО ЗОЗ РУСКИМ КУЛТУРНИМ ЦЕНТРОМ
Звит о потерашнїм контракту о хаснованю наших, парохиялних просторийох и сотруднїцтву зоз РКЦ поднєсол предсидатель ЦО Борислав Сакач. Принєшена одлука же би ше направел нови контракт и предлужело сотруднїцтво зоз Руским културним центром на идуци пейц роки.