НОВИ САД – Потомки славних писательох Мирослава Антича, Миколи М. Кочиша, Ференца Фехера и Радея Обрадовича, котри поховани, односно премесцени до Алеї славних писательох на Новосадским теметове, достали рахунки за гробни места, дзепоєдни и ретроактивно – аж за 20 роки – пишу новосадски медиї.
Потомки нєсподзивани, а окреме з нєпримераним одношеньом ґу вельким писательом, котри символ Нового Саду, Войводини и Сербиї.
Унук руского писателя Миколи Кочиша, Коля Кочиш, гварел же мушел плациц вецей як 20 000 динари як надополнєнє за отримованє гробу свойого дїда.
– Вони то роками нє фактуровали. Нє проблем у пенєжу, алє у одношеню ґу нашим предком. То нашо велїканє чийо нашлїднїки нєставаю, умераю, а дзепоєдни одходза з держави – гварел Коля Кочиш.
Проблем и у тим же кед нє будзе хто плациц отримованє гробу, покойни писателє буду преселєни до заєднїцкей гробнїци, додал Кочиш.
На наплацованє надополнєньох за отримованє гробох реаґовало и Дружтво за руски язик, литературу и културу, хторе Комисиї за представки и предкладаня гражданох Городу послало жалбу и предлог же би ше утаргло плаценє за отримованє гробних местох за шицких штирох писательох.
– То ганьба. Тоти штирме писателє тельо зробели за нашу културу, у школи нє мож прейсц класу кед нє знаце хто написал „Билу канджурку”, Кочиш написал перши руски словнїк. Нови Сад тераз постал и Европска престолнїца култури, а збува нам ше таке дацо – гварела представителька Дружтва Ирина Папуґа.
Предсидатель спомнутей комисиї Марко Йованович гварел же озбильно приступели ґу ришованю тей жалби, а плаценє предвидзене з городску одлуку о комуналних дїялносцох и хованьох.
– Управи за комунални дїялносци зме послали питанє яка би була процедура за ошлєбодзованє од плаценя за тих велїканох. Док увидзиме яка то процедура, пойдземе далєй, алє найменєй цо можеме зробиц у оддлужованю нашим писательом то ошлєбодзиц од плаценя за отримованє їх гробних местох – гварел Йованович.
На значосц спомнутих штирох писательох за Нови Сад указує и тото же по Ференцови Фехерови наволана площа у ширшим центре городу, мена Мирослава Антича и Миколи М. Кочиша ноша два улїци, а по Радейови Обрадовичови наволана награда за найлєпши роман за дзеци и младих хтору додзелюю Змайово дзецински бависка.
За розлику од Алеї славних писательох, у Алеї заслужних гражданох, дзе поховани народни героє, лєбо дакедишнї покраїнски функционере, надополнєнє за гробнїци ше нє наплацує.