ВЕРБАС – Дружтво инвалидох Вербас (ДИВ) поволує шицких людзох добрей дзеки же би помогли Софиї Виславски з Вербасу, хорей од церебралней парализи, котра з малим дзецком жиє у барз нєвигодних условийох.
Як наводзи портал локалней самоуправи Вербас, ДИВ Виславсковей уж однєсло часц помоци, алє здравствена и социялна ситуация тей жени и далєй нєришена и чежка.
София Виславски розидзена, мац троїх дзецох, двойо дзеци биваю з оцом, а вона жиє як подквартельош з єдним дзецком. Єдине приманє єй социялна помоц з Центру за социялну роботу, коло 10 000 динари.
Представителє ДИВ при одвичательних институцийох порушали питанє ришованя ситуациї Виславсковей, алє покля нє витвори свойо права на цудзу допатранє и други социялни даваня, потребна єй пенєжна и материялна помоц.
Шицки котри сцу помогнуц, пенєж можу уплациц на рахунок Ерсте банки: 340-32606695-77, на мено София Виславски.
Тоти котри жадаю помогнуц з дарованьом ґардероби, лєбо поживи, добродзечни прилог можу принєсц до Канцелариї за младих у Вербаше, а Дружтво инвалидох Вербас донацию прешлїдзи Софиї Виславски и єй фамелиї.
Вецей информациї о помоци можлїве достац на фейсбук боку Дружтва инвалидох Вербас.