Потребни нови учебнїк за виборну наставу

автор маф
990 Опатрене

РУСКИ КЕРЕСТУР – Одбор за образованє Националного совиту Руснацох вчера отримал свою порядну 5. схадзку на хторей розпатрал вецей актуални питаня, принєшени и даскельо заключеня и одлуки, а єдно од значнєйших то заключенє же потребни присподобенши учебнїк за виборну наставу.

Предсидателька Одбору Мелания Римар поинформовала о активносцох медзи двома схадзками, а медзи иншим у тей точки ше бешедовало и о нєдавним приходу школярох з наших местох на Драмски мемориял Петра Ризнича Дядї, цо финансує Одбор.

На схадзки Одбору єдногласно прилапени и вименки Правилнїка о стипендованю школярох у руским оддзелєню Ґимназиї „Петро Кузмяк”. Вименки ше одноша на тото же би першенство достац стипендию мали школяре хторим Ґимназия була перше жаданє, а котри виполнюю и други потребни условия. Конєчну одлуку о тим питаню принєше Национални совит.

У анализи прешлорочней Лєтнєй школи у Попраду, оценєте же вона була успишна, а за наступни роки Одбор принєсол заключенє о минималним софинансованю родичох школярох хтори пойду до школи.

У бешеди о учебнїкох Одбор принєсол одлуку же треба зложиц нови учебнїк за виборну наставу. З оглядом на искуства у пракси и на факт же школяре хтори виучую руски язик як виборни предмет вше менєй знаю бешедовац по руски, тому би требало прилагодзиц и нови учебнїк.

Члени Одбору дискутовали и о проблему бодованя задаткох на Закончуюцим испиту за осмакох зоз руского язика и його нєусоглашеносци зоз бодованьом тестох на язикох других националних меншинох и векшинского народу, та и з бодованьом тестох зоз других предметох, та поведзене же на тим треба инсистовац при одвичательних.

IMG_8512

ПОВЯЗАНИ ТЕКСТИ