У Стартит центру у Новим Садзе представени проєкти Еразмус за младих поднїмательох и Европскей поднїмательней мрежи, хтори ше реализує у рамикох КОСМЕ програми, цо заєднїцки орґанизовали ЕУ-инфо поинт Нови Сад, Универзитет у Новим Садзе и Дїловни инкубатор Нови Сад.
У полней сали Стартит центра заинтересованим за обласци аґроиндустриї, информацийни технолоґиї, туризем и културу, бешедовали проф. др Воїн Шенк, Мария Станчу Миросавлєв, Весна Рашкович Депалов, Владимир Никич и Наташа Вуйнович Седлар. За конкретни проєкти треба контактовац з тима представнїками зоз Стартит центра.
Циль стретнуца бул даванє информацийох младим поднїмательом о можлївосцох, концепту и вигодносцох приступа ґу новому тарґовищу, о потенциялних нагодох за сотруднїцтво з иножемнима партнерами, цо олєгча порушованє нового, лєбо моцнєнє уж постояцого подприємства.
Од 2013. по 2016. рок, з помоцу Европскей поднїмательней мрежи подписани коло 140 дїловни контракти, орґанизовани 125 подїї и уключени 2 500 клиєнти.
ПОМАГАЮ ИСКУСНИ ФАХОВЦИ
проф. др Воїн Шенк
– Єст нас коло двацец фаховцох хтори сцеме информовац заинтересованих и унапредзиц дїлованє – гварел у своєй уводней бешеди др Воїн Шенк. – Помагаме поднїмательом же би направели, написали свой профил, цо чежко, и же би були компатибилни з одредзенима стандардами, алє вец можу сотрудзовац зоз цалим шветом.
Мария Станчу Милосавлєв надпомла же Европска поднїмательна мрежа найвекша на швеце – у 60 державох швета ма 600 институциї, 4 000 локалних експертох и базу 15 000 профилох (дїловних понуканьох) як потенциялних сотруднїкох. На тих просторох координатор им Привредна комора Сербиї. Же би ше одредзене подприємство уключело до тей мрежи, муши мац свой профил, а же би дакого контактовало, треба же би глєдало интересантного сотруднїка.
През приклад о представяню и дїлованю єдного нашого студия за правенє компютерских бавискох, Наташа Вуйнович Седлар гварела же креативцом у тим подприємству Европска поднїмательна мрежа помогла же би ше унапрямели на фонди котри им дали потримовку.
О конкретизованю сотруднїцтва бешедовала и Весна Рашкович Депалов.
– Треба присц ґу нам, шеднуц, побешедовац и повесц цо одредзена компания, фирма, подприємство, ма понукнуц на тарґовищу, можебуц идею и з ким би могло сотрудзовац у Европи и швеце – потолковала Депалова.
– Ми обезпечуєме директни контакти медзи заинтересованима боками. Пред тим, треба формовац свою презентацию, односно профил свойого дїлованя. У списку, бази профилох, важни змист, односно зоз чим ше подприємство занїма, а нє мено. У препатраню понукнуцох за сотруднїцтво мено фирми анї нє видно, його ше увидзи после заинтересованосци за одредзену дїялносц – гварела Весна Рашкович Депалов. По єй словох, треба научиц як контактовац.
Наташа Вуйнович Седлар
НАГОДА ЗА ПЛАЦЕНЕ ПРЕБУВАНЄ У ИНОЖЕМСТВЕ
Владимир Никич поинформовал присутних о проєкту Еразмуса за младих поднїмательох (младих по стажу у поднїмательстве). Тот проєкт у Сербиї иснує уж штири роки. Вон оможлївює плацене усовершованє (за основни трошки) даґдзе у Европи, кед ше ма план як стартовац бизнис.
Наприклад, орґанизує ше и плаци поднїмательови же би од єдного до шейсц мешаци пребувал у иножемней компаниї при искусному поднїмательови, же би зберал искуство и дацо и зробел.
Єст штири крочаї – апликованє, повязованє заинтерсованих, правенє контракта, други пририхтованя и пребуванє у иножемстве. Добре тото же нє треба вельо документациї, и нє глєда ше подробно рахунки же дзе потрошени достати пенєж за пребуванє у иножемству.
Вельо ше идзе на довириє, алє єст и контроли же чи сце чесно приявели свойо податки и чи сце чесно анґажовани у поднїмательним сотруднїцтве.
ТРЕБА БУЦ КОНКУРЕНТНИ
Весна Рашкович Депалов потолковала накратко крочаї як ше роби.
– Перши крочай у конкретним бизнису то заинтересованосц за дацо и дакого. Ми помагаме у отвераню контактох, потим двоме поднїмателє витворюю директни контакт. Важне буц конкурентни, и чи дацо лєм понукаце, чи и глєдаце. Перше контактуйце з нами, же бисце нє трошели час. Источасно у цеку витворйованя цильох, учи ше и як ше то роби. Проєкти будземе писац вєдно.
Значи, на початку маме стретнуце, потим комуникацию заинтересованих поднїмательох, а потим валидацию, на яки способ ше будзе робиц. Треба мац вельо сцерпеня и мотивациї же би ше достало и витворело конкретни контракт – надпомла Депалова.
ДЕРЖАВА ДОДЗЕЛЮЄ СРЕДСТВА
Концом априла медиї обнародовали же Министерство привреди Сербиї обявелo явну поволанку за додзельованє безповратних средствох од 567,7 милиони динари за набавку опреми за мали и штреднї подприємства.
– То ище єдна мира з хтору порушуєме розвой малих и штреднїх подприємствох – гварел министер привреди Ґоран Кнежевич и додал же того року за тоту наменку предвидзени 18,2 милиярди динари, з чого коло 7,7 милиярди безповратни средства.
Министер визначел же 2016. рок бул „Рок поднїмательства”, хтори прероснул до „Децениї поднїмательства”, бо циль Влади же би ше привредни розвой фундаментовало на малих и штреднїх подприємствох хтори у цалосним бруто-домашнїм продукту (БДП) участвую з 50 одсто и з два трецини занятих у Сербиї.
Привреднїком тераз доступни 164,7 милиони еври вигодних кредитних средствох, а обецани и нови 150 милиони еври. У 2016. року було 2 703 вецей микро, мали и штреднї подприємства и поднїмательох як у 2015. року.