У квецарстве ружи квитню, алє у живоце, нє вше. Тоту файту польопривредней продукциї держава нє препознала як перспективну, субвенциї скоро же анї нє мож витвориц, понеже нєт катеґориї за квецарох. Грубеньово ше пренашли, знаходза ше на рижни способи, и помали розрабяю фамелийну роботу.
У дворе фамелиї Шандора и Даяни Грубеньових пахнє кветови полен ище од капурки. Такой мож обачиц и заквитнути пластенїки у загради, а у пластенїку Шандора, котри рихта квеце за пияц, коло нього забегую двоме хлапци, шейсцрочни Ерик и штиророчни Оскар, а супруга Даяна чува наймладшого члена Алберта, котри ма три тижнї.
Скорей як цо ше опробовали озбильнєйше у квецарстве, Грубеньово садзели и познату керестурску паприґу, а зоз квецом роботу розпочали 2011. року кед посадзели лєм єшеньски ружи, як их нєшка воламе хризантеми.
– Хризантеми зме садзели два роки, та аж потим зме ше почали занїмац зоз ширшу продукцию квеца. На нагварянє купцох и товаришох зоз пияцу, опробовали зме пестовац и ярнє квеце. Почали зме зоз скромним числом, 150 младима мушкатлами и кущик дробного квеца. Тей истей яри зме барз швидко розпредали нашо квеце, та сом докупйовал, понеже сом мал розробене место и стаємни муштериї на пияцу – толкує Шандор.
РОБОТА ПРЕЗ ЦАЛИ РОК
Тераз ґаздую зоз трома пластенїками, а маю под аренду ище два загради до котрих садза хризантеми кед им потребни векши простор. У єдним пластенїку пестую и прекрасни кали котри предаваю як резани квет. У шицких пластенїкох розцагал сам зогриванє, дзекуюци чому зменшал свойо укладаня, а як нам гвари наш домашнї, топи зоз соянку, та през жиму нє ма часу анї оддихнуц.
Квецарство значи роботу през цали рок, кущик шлєбодного часу маю влєце, алє и теди потребне залївац квеце котре пририхтую за єшеньску сезону, цо знова завиши од того яке лєто.
Продукцию ярнїх квецох починаю ище вжиме, так самостойно орезую младнїки зоз матичних рошлїнох и ожилюю их. Дзепоєдни файти продукую зоз гибридного нашеня котре наисце драге, а єст и таки за котри купую готови младнїки, понеже их нє можу одховац пре специфични условия котри вимагаю, лєбо пре простор.
– Младнїки орезуєме лєм за свою продукцию, медзитим, купуєме и од других прето же нє маме шицки фарби яки купци вимагаю – твердзи Грубеня.
ВЕЛЬО ЗАВИШИ ОД ХВИЛЇ
И квецарство завиши од хвилї, гоч ше им уда одховац квеце на час, покля хвиля нє вигодна же би ше го садзело вонка, потамаль людзе на пияцу нє купую.
– Прешлого року зме шицку арвачку розпредали ище у фебруару, а того року ище вше маме з нєй векшу часц. Причина то же бул досц жимни фебруар и початок марца, та нє було условия за садзенє. Тераз помали доходзи за предай беґония, алисиюм, кадифка, петониї, ґербери, винки и друге – гвари наш собешеднїк.
Продукую вельо файти квеца, же би кажди купец нашол дацо за себе, алє и сами вони видвоюю мушкатли котри роками найглєданши. З мушкатлох маю вецей файти, од класичних зуналох, цо мож садзиц до жеми, та по цагаци котри прикрашую жардинєри на балконох и терасох. Дакус менєй ше глєда, алє тиж у велїх фарбох и файтох, сурфиниї, котри уж порихтани на предай.