РУСКИ КЕРЕСТУР – Пресадзованє паприґи з пластенїкох на отворене польо у Руским Керестуре почало 2. мая, а вироятно будзе тирвац по конєц того, лєбо початок идуцого мешаца. Роботнїкох за пресадзованє єст, цо резултат роботи и закладаня и Здруженя паприґарох „Капсикум анум”.
У Руским Керестуре того року будзе засадзено коло 10 одсто менєй паприґи як прешлого року, а упутенши оценюю же под паприґу будзе коло 800 гольти. Зменшанє поверхносцох резултат прешлорочних проблемох з хоротами паприґи, як и слабшим одкупом.
Понеже вчас почало пресадзованє, початок оберачки паприґи мож обчековац скорей, аж и у першей половки авґуста.