ВЕРБАС – Штварток, 16. авґуста, у Вербаше почал други Куп нацийох у боксу за юниорох и юниорки, хтори того року позберал значно векше число учашнїкох як прешлого, а у Вербаше ше зишли аж 25 репрезентациї.
Дзень пред тим, вочи Купу, отримана и пригодна програма на централней площи у Вербаше, а штварок у велькей гали Центра за физичну културу отримана церемония отвераня, дефиле учашнїкох и уводни борби.
На змаганю наступя вецей як 200 боксере зоз цалого швета, у 185 борбох, а турнир у Вербаше найвекша боксерска манифестация у Европи и єдна з трох найвекших у швеце того року.
Як на отвераню визначел секретар турниру Иґор Шкундрич, манифестация рошнє и розвива ше з рока на рок, а интересованє же би ше уключела до орґанизациї такого велького спортского случованя виражела и Општина Кула.
Плакети за помоц у орґанизациї з тей нагоди достали директор ЯКП „Комуналєц” Синиша Адамович, помоцнїк городоначалнїка Нового Саду Срдян Кружевич, предсидатель Општини Кула Велибор Милоїчич и предсидатель Општини Вербас Милан Ґлушац.
Присутних привитал и директор турниру и функционер Боксерского союзу Войводини Йовица Панич, а у Вербаше ше по нєдзелю 19. авґуст буду змагац репрезентациї Азербейджану, Горватскей, Ческей, Ґрузиї, Нємецкей, Мадярскей, Индиї, Израелу, Казахстану, Словацкей, Шведскей, Росиї, Зєдинєних Америцких Державох, Велсу, Турскей и други.
