НОВИ САД – З потримовку Городу Нови Сад, вчера вечар на Площи шлєбоди у Новим Садзе шветочно отворени перши Фестивал любови, хтори тирва по 9. марец. Манифестацию отворел член Городскей ради задлужени за културу Далибор Рожич и представителє проєктуа „Европска престолнїца култури 2021”.
Главна тема Фестивалу то „Нови Сад – престолнїца любови”, а орґанизовани є пред наиходзацима шветами – Дньом залюбених и Свтятим Трифуном.
На окремней конструкциї з квеца на главней городскей площи залюбени пари можу заквачиц клатку любови, а на штандох на предай понукнути рижни сувенири, вино, лакотки, цепла чоколада, дарунки, док на централней бини наступя новосадски ґрупи и ди-джейове.
За малженски пари повинчани прешлого року будзе орґанизоване наградне бависко „Кельо ше познаме” (пари ше можу приявиц прейґ е-адреси nsfestivalljubavi@gmail.com), бависко будзе 13. фебруара, а награда за побиднїцку пару путованє на Копаоник.
У сотруднїцтве з новосадскима ґалериями и музеями, под час Фестивалу виложени фотоґрафиї новосадских авторох з тему „Любов”, а свойо уметнїцки дїла представяю и студенти скулпторства. Їх роботи на предай, а приход наменєни прилапююцому центру за бездомнїкох у Футоґу.
Фестивал орґанизую компаниї Color Press Grupa и Ninamedia, а вецей деталї о Фестивалє мож найсц на Фейсбук-боку – Festival ljubavi Novi Sad.