Почал упис на универзитети у Новим Садзе и Беоґрадзе

автор днв/тнґ/мар
974 Опатрене

НОВИ САД – На факултетох универзитетох у Новим Садзе и Беоґрадзе почало приманє приявох за покладанє приємних испитох, а прияви мож придац до конца того тижня.

Покладанє приємних испитох у Новим Садзе будзе од 28. по 30. юний, а на Факултету за спорт и физичне воспитанє од 3. по 5. юлий. Прелиминарни лїстини, зависно од факултету, буду обявени од 29. юния по 3. юлий, а конєчни од 30. юния по 17. юлий. Упис тогорочних бруцошох будзе од 3. по 21. юлий.

Универзитет у Новим Садзе (УНС) на своїх 14 факултетох того року понука 9 559 места за будуцих студентох, а з того числа 5 391 место на буджету, а 4 160 на самофинансованю.

Цени школаринох остали исти як прешлого року, найвекша на фахових студийох оптометриї на Природно-математичним факултету – 218 900 динари, дзе єст лєм самофинансуюци места, а найтуньша на Педаґоґийни факултету у Зомборе и Учительским факултету на мадярским язику у Суботици – 50 000 динари. Цени школаринох звекшани лєм на интеґрованих студийох медицини и стоматолоґиї на анґлийским язику, та буду 5 500 еври.

На основних фахових студийох хтори маю 180 ЕСПБ и тирваю три роки, а здобува ше назва „бечелор”, єст места за 95 буджетних и 213 самофинансуюцих студентох. Таки студиї понукаю Медицински, Природно-математични, Факултет технїчних наукох и Факултет за спорт и физичне воспитанє.

Основни академски студиї, зоз 240 ЕСПБ и тирваньом найменєй штири роки, дзе ше здобува назва „дипломовани”, понукаю шицки факултети УНС и єст 4 931 место на буджету и 3 690 самофинансуюци. За интеґровани студиї, з найвецей 360 ЕСП бодами, конкурс розписани за 365 буджетни и 257 самофинансуюци места. Tаки студиї мож уписац на Польопривредним, Медицинским и Природно-математичним факултету.

На Универзитет у Беоґрадзе покладанє приємних испитох будзе од 26. юния по 2. юлий, зависно од факултету. Конєчни лїстини буду обявени 10. юлия, а упис од 10. по 14. юлий. Други уписни термин почнє 1. септембра, а ма буц закончени по 16. септембер.

ПОВЯЗАНИ ТЕКСТИ