ШИД – Вчера, 25. авґуста, почала перша фаза роботох на ушореню будуцей Индустрийней зони нєдалєко од Адашевцох, а роботи обишол предсидатель Општини Шид Предраґ Вукович.
Як гварел Вукович, будує ше коло 800 метери приступней драги, широкей седем метери, а вредносц роботох виноши скоро 33 милиони динари. Половку средствох обезпечела Управа за капитални укладаня АП Войводини, а половку Општина Шид.
У другей половки септембра мали би почац друга фаза ушореня, та буду викопани ярки за одцеканє води, а вредносц тей фази роботох 12 милиони динари. Секретарият за польопривреду, водопривреду и лєсарство АП Войводини обезпечи шейсц милиони динари, кельо опредзелї и Општина Шид – виявел предсидатель Вукович.
