РУСКИ КЕРЕСТУР – Нєшка у Руским Керестуре почина тогорочна, седма по шоре, дводньова туристично-привредно-културна манифестация „Днї керестурскей паприґи”.
Нєшкайша програма почнє у центру Руского Керестура на 10 годзин зоз змаганьом у вареню айвару, цо першираз орґанизоване на тей манифестациї.
Стретнуце одкупйовачох и продуковательох паприґи предвидзене за 14 годзин, а од 15-17,30 годзин орґанизоване обиходзенє даскелїх польох под паприґу.
На 14 годзин у центру валала почнє и вистава паприґи и продуктох з паприґи и другей желєняви, продуктох домашнього виробнїцтва, старих ремеслох и сувенирох. У програми котра будзе тирвац до 22 годзин, будзе пририхтованє традицийних єдлох, дефиле парадних запрагох Конїцкого клубу „Русин” и госцох Клубу. Як орґанизатор скорей сообщел, варенє рижних єдлох будзе у 14 котлох, цена порциї за векшину будзе 300 динари, а будзе ше вариц рибов котлїк, полнєта паприґа, капуста, паприґаш з баранїни и баранчецини, а з єленя будзе коштац 400 динари. Будзе и печеня и роштиль.
Шветочне отверанє манифестациї з културно-уметнїцку програму предвидзене за 17,30 годзин, а потим на 18,30 годзин маскенбал дзецох и додзельованє наградох за найкрасшу маску, найчежшу паприґу, за найкрасши штанд и найсмачнєйши айвар. Од 16 годзин нащивителє манифестациї годни опатриц и Музейну збирку у Замку.
Концерт ґрупи „Ґарави сокак” почнє на 21 годзин, а друженє и розвага будзе предлужена до 2 годзин по полноци.
На нєдзелю, 25. авґуста, место Конїцких обегованьох котри ше предходних рокох отримовали другого дня манифестациї, будзе орґанизоване обиходзенє и розпатранє валалу на парадних кочох Конїцкого клубу „Русин”.
З тей нагоди на Дньох керестурскей паприґи ше обчекує и госцох зоз Калочи, госцох зоз Словацкей, представнїкох локалней и покраїнскей власци, одкупйовачох зоз держави и иножемства, як и заградкарох зоз цалей Сербиї.
Першираз манифестация будзе софинансована и зоз средствох Европскей униї, на основи проєкту „Стари обичаї у новей форми”, котри настал як продукт сотруднїцтва побратимених Општини Кула и Калочи у Мадярскей, о чим информация була обявена скорей.