Почина Републични фестивал аматерских театрох Сербиї

автор зам
968 Опатрене

КУЛА – У Кули нєшка, 16. юния, почина 59. Републични фестивал аматерских театрох Сербиї, на хторим ше по пияток, 23. юния, змагаю осем найлєпши театрални представи з вецей местох у Сербиї, медзи нїма аж три з кулскей општини.

Фестивал нєшка почнє з отвераньом вистави малюнкох Шандора Керекеша у Подобовей ґалериї Културного центру (на 19 г.), на 19,30 г. опрез Културного центру будзе подзвигнута фестивалска застава и запалєни фестивалски факлї, а на сцени Културного центру Фестивал отвори ґлумица Ана Софренович (на 20 г.).

У змагательней конкуренциї участвую аматерски театрални ансамбли зоз Мачванского Прнявору, Беоґраду, Червинки, Лебанох, Крущичу, Велькей Плани, Рачи и Кули, а после преглашеня побиднїкох, Фестивал на соботу, 24. юния завре госцуюца представа Театру младих з Нового Саду.

З кулскей општини на Фестивалє участвую представи „Малогражданска свадзба” Б. Брехта, у режиї Радоя Чупича Театру „Стеван Сремац” з Червинки; „Каньош Мацедонович” В. Оґнєнович, у режиї Деяна Цицмиловича Драмского студия „Луча” КУД „Крущич” з истоменого места и „Трактат о служнїцох” Б. Чиплича, у режиї Драґана Остоїча Културного центру Кула.

Шицки представи ше виводзи на сцени Културного центру Кула на 20 годзин, а Фестивал орґанизую Союз аматерох Сербиї и Културно-просвитна заєднїца Општини Кула, под покровительством Општини Кула.

ПОВЯЗАНИ ТЕКСТИ