БЕОҐРАД – По роботней верзиї Нарису закона о основох системи образованя и воспитаня, за родичох чийо дзецко малтретирує своїх парнякох у школи, нарушує угляд и чесц другого школяра, лєбо наставнїка, предвидзени пенєжни кари од 3 000 до 100 000 динари, пише Танюґ, а того тижня пренєсли нашо медиї.
Кед тоти одредби нового закона буду прилапени, родичи пенєжно буду покарани и кед нє упишу на час дзецко до предшколскей програми, лєбо до школи, алє и кед у чаше од 8 днї нє оправдаю виоставаня зоз школи. За тото предвидзени кари од 5 000 до 100 000 динари.
За чежши потупеня дзецка у школи, по роботней верзиї Нарису закона за родичох предвидзена потупова, лєбо виновна одвичательносц, а хаснованє алкоголу, догану, наркотикох, уношенє оружия до школи, лєбо хаснованє мобилних телефонох за загрожованє правох других школярох, лєбо за спреводзки при оценьованю, тиж дефиновани як чежше повредзованє обовязкох.
Перши раз предвидзени пенєжни кари и за секретарох школох котри буду нєсовисно окончовац свою роботу – од 5 000 до 100 000 динари. Министер просвити Младен Шарчевич ище скорей гварел же секретаре школох буду покарани кед, як правнїки, нє спозоря директорох най нє уходза до судских поступкох хтори буду страцени.
Предложене и же би ше час хтори дзеци препровадза у школи вецей нє мерало по школских годзинох, алє нормалних годзинох и же би ше до їх роботного дня ураховало и обовязни и виборни годзини и звонканаставни активносци.
Новосц Нарису и же велька матура будзе пририхтана за школски 2018/19. рок и же обща матура заменї приємни испити на факултети, алє би тот модел перше бул випитани як пилот-проєкт, а аж потим уведзени до шицких школох.
Ище скорей медиї писали же Нарис закона предвидзує же остатнє слово о виборе директора будзе мац министер просвити, а о шицких новосцох тераз тирваю розгварки представительох Министерства просвити и репрезентативних синдикатох, котри маю пригварки на роботну верзию Нарису, а єдна з найвекших же нє були од початку уключени до вирабяня закона.