РУСКИ КЕРЕСТУР – По улїцох и заградох у Руским Керестуре тих дньох покладзени ознаки и менши апарати коло нїх, ткв. ґеофони, хтори служа за нукашнї, сеизмични випитованя жеми хтори НИС тераз окончує у хотаре и местох, од Кули по Оджак и далєй.
Апарати цалком безопасни за людзох, а служа як сонари за меранє составу жеми у єй глїбини под час преходзеня камиону НИС-у, хтори прейґ окремней вибрираюцей плочи випитує жем. Камион тераз кажди дзень преходзи по даєдней улїци.
Як дознава Рутенпрес, у Керестуре покладзени коло тисяч апарати у пречнїку од коло три километри и служа лєм за сеизмичне випитованє жеми, односно чи єст нафти, лєбо ґазу, а после випитованьох буду склонєни.
Випитованє нафти и ґазу у хотаре закончене од Кули по Керестур, тераз на шоре випитованє у самим валалє, а потим будзе предлужене у хотаре спрам Лалитю.
З Месней заєднїци надпоминаю же власнїки, лєбо хаснователє жеми, до Месней заєднїци и далєй можу принєсц катастерски числа своїх парцелох за надополнєнє чкоди пре преход „нафташох”.
Кед же очкодовани нє буду поволани з НИС-у, пре надополнєнє чкоди ше можу явиц на телефони 064/888-4034, 064/888-8936, 064/888-5550, 064/888-8620 и 064/888-2881.