КУЛА − Вчера вечар, у просторийох РКУД „Др Гавриїл Костельник” у Кули, отримана схадзка Управного одбору (УО) Рускей матки (РМ). Попри членох УО, схадзки присуствовали Михайло Катона и Борислав Сакач, предсидатель Церковного одбору грекокатолїцкей церкви Святих апостолох Петра и Павла у Новим Садзе.
На початку зашеданя, УО утврдзел делеґацию за одход на X Медзинародни биєнале лемковскей/русинскей култури у Кринїци у Польскей 19. и 20. мая, у зменшаним составе – Дюра Папуґа, Юлиян Лазор, Борис Фейди и Славко Пап. Першенствено було плановане же би на фестивал путовала и шпивацка ґрупа зоз КПД „Карпати” з Вербасу, од чого одустали, понеже з проєктом по тей основи, достали вельо менєй средства як цо потребне за автобус.
Надовязуюци ше на значне зменшанє средствох, поровнуюци з прешлим роком цо достали по конкурсох, Дюра Папуґа винєсол информациї о познатих резултатох конкурсох. Средства котри нє одступаю од прешлорочних то з Општини Шид за „Русин филм фест” 100 000 динари и з Општини Кула за Стретнуце поетох у Руским Керестуре 30 000 динари. З Покраїнских секретариятох им одобрени два раз по 20 000 динари, цо вельо менєй як цо предвидзене з проєктами – з єдного средства за порядну дїялносц, а исту суму достаню и по конкурсу з Националного совиту. Ище вше обчекую резултати штирох конкурсох, од котрих за РМ найзначнєйши Министерства за културу и информованє за видаванє глашнїка „Руснак”.
Информациї о запровадзеней явней розправи о Нарису закона о вименкох и дополнєньох Закона о националних совитох националних меншинох Републики Сербиї и поступку його прилапйованя винєсол Борис Фейди, а през дискусию розправяне о розликох у одношеню на прешли Закон, та заключене же по питаню виберанкох нє будзе сущни пременки, и же потребне причекац його прилапйованє за пририхтованє за наиходзаци виберанки.
Реаґуюци на виску же у порти грекокатолїцкей церкви святих Апостолох Петра и Павла буду поставени мраморово плочи покойним предняком Союзу Руснацох Українцох Сербиї, на схадзку бул поволани и Борислав Сакач. Сакач розтолковал же схадзка Церковного одбору на котрей плановане одлучовац о тим будзе на пондзелок, 7. мая, алє же уж иснує начална и нєформална догварка же таки плочи нє годно поставиц до церковней порти, алє лєм до парохийного двора. По тим питаню, УО принєсол одлуку же буду благочасово реаґовац зоз заувагу котру пошлю Церковному одбору и владикови котри о тим ма принєсц конєчну одлуку.
Як дополнююца точка дньового шору, на предклад Моники Гарди з Коцура, прилапене же би ше, кед будзе средства, як єден з трох додаткох глашнїка „Руснак” у тим року друковал и каталоґ роботох з Подобовей колониї „Коцур 2018”.
