РУСКИ КЕРЕСТУР – На парохиї у Руским Керестуре од 23. по 25. май предлужене скенированє, фахови обробок и идентификованє особох на фотографийох фотоґрафох оца и сина Будинскових-Бруґошових, и то уж треца часц того велького подняца хторе почало 2015. року.
Роботу окончую познати фаховци др Миряна Дєкич и Неделько Маркович з Покраїнского заводу за защиту памятнїкох, Любица Отич з Музею Войводини, а помага им и Саша Сабадош з Архиву у Зомборе.
Як за Рутенпрес гварела Отичова, на тот завод акцент им на идентификованю особох на фотоґрафийох и допольньованє податкох, прецо за два днї анґажовали шесцерих информаторох з Керестура, котри им помагаю у тим процесу.
Источашнє ше и далєй скенирує фотоґрафиї зоз зачуваних неґативох, а векшина то фамелийни фотоґрафиї настали медзи двома шветовима войнами и познєйше.
По словох Отичовей, у тим барз длугоким и нє лєгким процесу чисценя неґативох, скенированя и їх идентификованя, за тераз єст 600 скенировани фотоґрафиї, а по конєц рока би сцели обробиц до 1 000, кельо ище и останю нєобробени.
З идентификованих фотоґрафийох прешлих рокох пририхтани два розлични вистави у Свиднїку и Беоґрадзе, а пририхтує ше и кнїжку фотоґрафийох, чийо видаванє завиши од динамики роботи, часу и финансийох.
Терашню фазу спомнути фаховци окончую у рамикох порядних роботох у своїх институцийох, а змесценє и кост у Керестуре им обезпечел Национални совит Руснацох.