Предсидателька Влади вчера нащивела Кулу

автор яви
713 Опатрене

КУЛА – Предсидателька Влади Републики Сербиї Ана Брнабич вчера, 12. децембра, нащивела новоотворену фабрику „Еуро ин” у индустрийней зони у Кули.

Премиєрку дочекали представителє Општини и самей фабрики, хтори єй представели роботу и плани за дальше унапредзованє. После обходу фабрики, вияву за медиї дали директор фабрики Антонио Кадяро, предсидатель Дочасового орґану Велибор Милоїчич и Ана Брнабич.

Велибор Милоїчич подзековал премиєрки на єй нащиви, як и на помоци и потримовки Републики Сербиї, и гварел же тераз у фабрики „Еуро ин” заняти коло 70 особи, а то лєм перша фаза, бо би по 2021. рок требали буц заняти вкупно 600 особи.

Предсидателька Влади виявела же отверанє фабрикох и прицагованє инвестицийох чежка робота, алє план же би ше, попри других, и општина Кула дзвигла на ноги, бо конєчни циль Влади отверанє нових роботних местох и лєпши условия за живот шицких гражданох.

После обходу фабрики, делеґация пошла до Општини, дзе вельочислени гражданє дочекали премиєрку опрез Святочней сали, а после того отримана схадзка премиєрки зоз руководством кулскей Општини.

ПОВЯЗАНИ ТЕКСТИ