КУЛА – Представа Аматерского театру „Стеван Сремац” Дому култури з Червинки „Малогражданска свадзба” Бертолда Брехта, у режиї Радоя Чупича, преглашена за найлєпшу и достала Златну плакету на 59. Републичним фестивалє аматерских театрох Сербиї, хтори у Кули отримани од 16. по 24. юний. Ґу тому, єй режисер Чупич наградзени за найлєпшу режию и костими, а Єлена Салонтаї достала Похвалу за найлєпшу хореоґрафию у представи „Малогражданска свадзба”.
Стриберну плакету, односно друге место на Републичним фестивалє достала представа „Мили тато”, у виводзеню Студия ґлуми „Театер 011” з Беоґраду, а Бронзову плакету и треце место представа „Беоґрадска трилоґия”, у виводзеню Театру Културного центру „Радоє Доманович” з Рачи.
У тогорочней конкуренциї були осем представи, медзи нїма аж три з местох у кулскей општини – попри з Червинки, змагали ше и представи Драмского студия „Луча” КУД „Крущич” з истоменого места и аматерох з Културного центру Кула.
Награду за найлєпше одбавену хлопску улогу на цалим Фестивалє достал Йован Паул зоз Сивцу, за толкованє улоги „Фурлана” у представи „Каньош Мацедонович” аматерох з Крущичу, а за улогу „Видосави” у истей представи похвалєня Милица Буквич з Кули.
Представа Кулянцох „Трактат о служнїцох” достала три похвали – Снежана Давидович за маску, Боян Алексич за ориґиналну музику, а Слободан Ноґавица за одбавени вецей улоги у спомнутей представи.
Представи оценьовал жири у хторим були режисер и ґлумец Мирослав Бенка зоз Старей Пазови, театролоґ мр Мирослав Радонїч з Нового Саду и ґлумец Миломир Неделькович з Кралєва, а Фестивал орґанизовали Союз аматерох Сербиї и Културно-просвитна заєднїца Општини Кула, под покровительством Општини Кула.
Побиднїцка и другонаградзена представа на Републичним фестивалє у Кули буду представяц Сербию на Реґионалним фестивалє аматерских театрох у Требиню.