РУСКИ КЕРЕСТУР – Основна школа „Петро Кузмяк” вовторок була домашня представяню Предкладаня програми сербского як нємацеринского язика наставнїцом хтори тот язик викладаю у школох з руским наставним язиком. На презентациї були наставнїци з домашнєй школи, и зоз школох у Коцуре и Дюрдьове.
Документ Предкладаня пририхтали фаховци зоз Заводу за унапредзенє образованя и воспитаня у сотруднїцтве з Мисию ОЕБС-у у Сербиї. У керестурскей Школи го презентовали професорка Весна Країшник, Наташа Добрич и Даяна Милиїч Шубич.
У предложеней програми сербского язика як нємацеринского новосц же ше окремну увагу пошвеци акценту, же би ше школярох обучело за участвованє у шицких формох бешедней комуникациї на тим язику. То значи же школяре вецей нє буду учиц лєм ґраматични правила, алє и їх функционалне применьованє.
У наступним периодзе будзе пририхтана обука наставнїкох за применьованє новей програми, а вони годни дац и свойо предкладаня за злєпшаня у роботи.
На презентациї Програми у Керестуре учашнїкох привитала директорка домашнєй Школи Хелена Пашо Павлович.