РУСКИ КЕРЕСТУР – Представителє Основней школи зоз Земплинскей теплици, зоз Словацкей – дзевецеро школяре, тиж тельо наставнїки и директор Павле Роман, од 8. по 11. юний були у нащиви Школи „Петро Кузмяк” у Руским Керестуре, а нащивели и Нови Сад, Фестивал „Веселинку”, як и дзепоєдни туристично интересантни места у Войводини.
У керестурскей Школи их штварток вечар дочекали и привитали педаґоґинї Любица Няради и Мария Шанта, секретар Школи Михайло Надь, а спред Националного совиту (НС), як другого домашнього, предсидатель Вивершного одбору НС Желько Ковач.
Школяре зоз Словацкей ше пияток вечар дружели з домашнїма школярами котри у януару були їм у нащиви, а пребуванє у Керестуре госци закончели вчера дополадня з присуством на Служби Божей у Катедралней церкви, а пред одходом нащивели и Марийово святилїще Водицу.
