НОВИ ПАЗАР – После схадзки Координациї националних совитох (НС-ох) националних меншинох у Сербиї, хтора 12. мая отримана у Новим Пазаре у шедзиску НС Бошнякох, од половки рока предшедованє з Координацю од Бошнякох пребера НС Мадярох у Сербиї, котрому тераз на чолє Єне Гайнал, дознава Рутенпрес од предсидателя Вивершного одбору НС Руснацох Желько Ковача, котри присуствовал на схадзки у Пазаре.
Пре законченє єднорочного предшедованя, схадзка у Новим Пазаре, хтору водзел дотерашнї предсидатель Координациї др Сулейман Уґлянин, була и церемониялно-шветочна, а присуствовали чолнїки, лєбо представителє 16 з 20 националних совитох у Сербиї.
У роботней часци Координация прилапела Принципи своєй роботи, пополєнти и состави 12 фахових роботних целох Координациї, дзе у трох ище од скорей и представителє НС Руснацох – Наташа Макаї Мудрох у Роботним целу за забрану дискиминациї, Мелания Римар у Роботним целу за образованє и Йоаким Грубеня у Роботним целу за одвитуюцу заступеносц припаднїкох националних меншинох у явним секторе и явних подприємствох.
Винєшени и звити о участвованю представительох Координациї у роботних целох за вименку, дополнєня, лєбо виробок законох вязаних за права националних меншинох и национални совити, а бешедоване и о провадзеню реализациї Акцийного плану за витворйованє правох националних меншинох у Републики Сербиї у рамикох Поглавя 23 у процесу прегваркох о приступаню Сербиї ґу ЕУ.
И на тей схадзки визначене же остатнї час найвецей поробене у обласци образованя на язикох националних меншинох, у сотруднїцтве з державнима ресорнима орґанами, так же и похвалєна велька активносц Роботного цела за образованє Координациї НС-ох.
Координация прилепела и Нарис закона о буджетним фонду за национални меншини, хтори будзе предшлїдзени одвитуюцим компетентним державним орґаном, а з часци бешедоване и о пририхтованю за схадзку Совиту за национални меншини Влади Републики Сербиї, хтора ма буц идуцого тижня, 23. мая у Беоґрадзе.
Дзень пред схадзку Координациї, представителє НС-ох у Сербиї у Новим Пазаре були госци Националного совиту Бошнякох на означованю 11. мая, Националного швета Бошнякох у Сербиї – Дню бошняцкей националней застави.