През задлужованє до злєпшаня здравства и водопривреди

автор ядю
865 Опатрене

НОВИ САД – На схадзки Скупштини АП Войводини, котра отримана 29. марца, вигласани ребаланс буджету за 2018. рок, як и одлуки за задлужованє пре капитални инвестициї до здравства и водопривреду.

З прилапеним ребалансом предвидзене задлужованє за 1,6 милиярди динари, у тирваню од шейсц роки, з ґрейс периодом од рока, док ше пожичени средства будзе одплацовац пейц роки.

Як обгрунтовал предсидатель Покраїнскей влади Иґор Мирович, укладанє до здравства приоритет и вше є нєобходне, нє же би ше надополнєло даяку чкоду, алє пре обновйованє и унапредзованє системи здравственей защити у Войводини.

Средства у обласци водопривреди буду потрошени у першим шоре на санацию Велького бачкого беґелю хтори ше одвива у штирох фазох. Мирович визначел же Покраїна войдзе до другей фази, а остатня и найчежша фаза то санация коло шейсц найкритичнєйших километрох у околїску Вербасу. Медзитим, тота фаза муши причекац початок роботи пречисцовача одрутних водох, та ше предпоставя же остатня фаза пречисцованя почнє аж 2020. року.

Покраїнска секретарка за финансиї Смилька Йованович гварела посланїком же тоти одлуки о задлужованю нє могли буц принєшени кед ше прилапйовало буджет за 2018. рок, прето же ше теди ище нє знало кельо вкупно средства буду пренєшени до того року и як будзе випатрац комплетна финансийна слика буджету АПВ. Вона наглашела же би подписованє контракту о кредитованю требало буц реализоване 31. мая.

 

ПОВЯЗАНИ ТЕКСТИ