РУСКИ КЕРЕСТУР – Початком тижня по дружтвених мрежох, а потим и у медийох, одгукнул апел предсидателя Совиту Месней заєднїци Руски Керестур Владимира Олеяра, котри од Войводянскей желєней инициятиви и медийох глєда помоц у ришованю проблему з кравми зоз фарми „Кварк”, дзе дакеди у Керестуре була „Економия”.
Тот проблем у валалє актуални уж даскельо роки – гладни крави з фарми валяю огради и дакеди пойду аж три километери од фарми. Уходза людзом до польох, на хторих правя огромни чкоди, обачене же иду и на теметов, та аж и до рибалову. Виходза на главну драгу и вецей раз спричинєли транспортни нєщесца. Гражданє писали петициї, случаї приявйовани до МЗ, полициї, инспекцийом, алє дотераз нїч нє ришене.
Як за „Рутенпрес” гварел предсидатель Совиту МЗ Владимир Олеяр, на основи прияви з МЗ 2014. року на терен вишла Ветеринарска инспекция зоз Зомбора, после чого до МЗ сцигол допис же фарма кравох „Кварк” набавела даскельо пси и оправела огради, а инспекция нє ма компетенциї за преберанє других мирох.
Прешлого тижня Олеяр и член Совиту МЗ Звонко Рац були на фарми, дзе видзели яки стан и у яких ше условийох трима крави, алє з власнїком „Кварку” Александром Радуловичом дотераз нє мали контакт. На основи видзеного заключели же о кравох нїхто нє водзи рахунку, так же у апелу хтори послал медийом, Олеяр пише: „Проблем же тоти крави жию у нєгуманих условийох, нє маю цо єсц, єдза гной, а кравски здохлїни вшадзи по фарми. Крави хори и, понеже су гладни, пребиваю огради и уходза до польох и людзом правя чкоди, єдза шицко живе, ґажа и знїщую”.
Апел медийом и здруженьом превжати як уж тераз єдини способ виношеня того проблему до ширшей явносци и же би ше порушало його ришованє. Же проблем одгукнул, указує и факт же ше за ньго заинтресовали и значни медиї у нашей жеми.