Премиєра

автор дюра латяк
1.2k Опатрене

Як уж спомнуте, перши Драмски мемориял Петра Ризнича Дядї отримани од 6. по 11. април 1969. року у Руским Керестуре. Новинаре и репортере провадзели кажду манифестацию и представу, и у звитох давали свой суд.

Мемориял почал з Отвераньом вистави малюнкох и трофейох Петра Ризнича – Дядї, а у наявеним репертоару писало так: У вечаршей програми, Мемориял почина зоз комедию „Женїдба” од Николая Ґоґоля у виводзеню Аматерского театру Дома култури з Руского Керестура. Ютредзень, 7. априла, Дзецинска драма аматерского театру Дома култури з Руского Керестура у пополадньовей програми одбави дзецински театрални фалат „Гайди” од Йогана Спури, а вечар драмска секция Културно-просвитного дружтва „Дюра Киш” зос Шиду одбави комедию „Ожалоссцена фамилия” од Бранислава Нушича. Драмска секция Културно-просвитного дружтва „Максим Горки” з Нового Саду 8. априла да два драмски фалати – „Чловек з народу” од Михала Ковача и „Злєтанє у Паризу” од Марка Камелотия, а ютредзень, 9. априла Аматерски театер зоз Кули одбави театрални фалат „Трактат о служнїцох” од Боґдана Чиплича. Сербски народни театер з Нового Саду 10. априла виведзе комедию Йована Стериї Поповича „Поп Чира и поп Спира”, а 11. априла Українски народни театер зос Прешова наступи з єдним театралним фалатом – Шилерова „Мария Стюард”, або „Лєсова писня” Лесї Українки.

Як будземе видзиц у звиту после отриманого меморияла, наявена програма кориґована  зоз наступом Аматерского театра з Кули и Українского народного театра з Пряшова, котри наявени репертоар заменєли зоз театралним фалатом П. Драшковича „Єдловнїк” и музичну комедию братох Мовсесових „Яр пришла до места”. Драмска секция КПД „Максим Горки” з Нового Саду нє наступела.

ОДГУКИ ПОСЛЕ ПЕРШОГО МЕМОРИЯЛА

У „Руским слове” ч. 15. од 11. априла 1969. року новинаре Ирина Гарди и Иван Бесерминї свойо упечатки так описали:

Внєдзелю вечар, у Руским Керестуре, отворена смотра аматерских и професийних театралних колективох – Мемориял Петра Ризнича – Дядї. Пред полну салу публики, фамелию покойного Петра Ризнича и госцами: Мичом Василєвичом, секретаром Културно-просвитней заєд- нїци Войводини, Светиславом Стояковим, секретаром ОК СК зос Кули, Владимиром Прекайцом, предсидательом ССРН зос Кули, Мирком Петрушичом, секретаром кулскей Културно-просвитней заєднїци и другима о роботи и живоце Петра Ризнича – Дядї, бешедовал Дюра Папгаргаї, предсидатель Одбора драмского меморияла. Петро Ризнич, чийо найвирнєйши шлїдбенїци на полю аматеризма и иницирали таки мемориял, и на нїм з часци участвовали,  у своєй длугорочней роботи, найвецей на релациї Руски Керестур – Кула – Вербас, дал нєзабутни режисерски, ґлумецки и чловечи витвореня. За таки успихи на полю аматеризма вон достал и златну значку, а мемориял на чесц його мена лєм єдно лоґичне припознанє памятком на його нєвичерпни ентузиязем котри и нєшка прейґ здогадованя вожд добрей часци нашого аматеризма.

Petro Riznic pod leptir masljuУ рамикох Меморияла орґанизована и вистава дзепоєдних малюнкох Петра Ризнича, а члени Дома култури з  Руского  Керестура вєдно зоз госцами Меморияла, членами колектива УНТ зоз Прешова (ЧССР) орґанизовали и покладанє венцох на його гроб у Вербаше, и евоцирани памятки на його живот и роботу.

Коментаруюци наступ Керестурских аматерох у спомнутим звиту, новинаре после поднаслова „Керестурцом на поцешенє” зазначели:

„Домашнї мали подзековну улогу, розпочац демонстрацию квалитетного аматеризма и професионализма пред прикладну, коректну публику. Хто нє патрел по тераз їх представу, а обчековал „Женїдбу” таку як цо ю видзел у скорейшим толкованю наших аматерох, вшелїяк  ше нєсподзивал. Уж такой по отвераню бини, на перши звуки музики, почувствовал ше дих сучасного; сцена фахово поєдноставена и до конца функционална. Патрачом нє завадзала анї єдна нєпотребна ствар же би на нєй застановели очи, так же ше могли на мире препущиц уживаню, слухац и провадзиц аматерох, котрих уж од скорей „биє глас” же су вибрани медзи найлєпшима. Медзитим, було би нєпоправдзе нє наглашиц же медзи тима „фаховцами” дебитант Наталия Колбасова, заш лєм здобула найвекши припознаня. На часи аж и нєулаплїво бравурозна була и Ирина Олєярова, а ю шлїдзели хлопи: Витомир Бодянєц, Микола Скубан, та и Владо Дудаш зоз Янком Павловичом. И други дебитант у фалаце Янко Рац ше достойно оддлужел за приманє до дружтва найлєпших. Юлин Стриберов потвердзел свойо богате искуство. Афия Рамачова коректно окончела задачу, а дзивчата: Ярослава Кочиш, Злата Гарди и Мария Будински удатно ошвижовали и дополньовали  сцени.

ПУБЛИКА ЛЮБЕЛА КОМЕДИЇ

Режисер фалата Дюра Папгаргаї ше може цешиц у своєй роботи, а Дом култури найщирше подзековац на помоци режисерови з Прешова Йосифови Фельбабови котри сценски поставел тот театрални фалат.”

Виношаци свойо упечатки о наступе Шидянох, репортере после поднаслова „Оправдане анґажованє часу и простору” у уж спомнутим звиту наводза и тото:

„Пондзелок вечар шидянска „Ожалосцена фамилия” виволала интересованє керестурскей публики котра ше зишла у красним чишлє ище раз ше нашмеяц гумору Бранислава Нушича. Факт же комедиї и при наших людзох, як цо то углавним пред кажду, окреме валалску публику, виволую окремни симпатиї, та розумлїве же и Шидянє нє розчаровали присутних у сали Дома култури. Режисер вше актуалней комедиї, Янко Саламун, уложел красни труд до поставяня того фалата на сцену. Його постановка Аґатона (Владо Дорокази), Танасия (Венямина Бульчика), та и тих улогох цо их толковали Нада Майхер, Нада Бодваньски, Гелена Миклош, Вера Загорянски, Мирко Митров, Мирослав Цирба, Томислав Майхер, Єлка Митрова, Ана  Миклош и Мирослав Джуджар, углавним шлїдзели приклади патрених Нушичових комедийох. Прето нормалне же тота представа котра дата у Керестуре нє одступала од того цо уж видзене, алє источашнє оможлївела младим Шидяньом же би доказали  свою порихтаносц и прихильносц ґу сцени и же було наисце оправдане резервовац за їх наступ у рамикох  Драмского мемориялу єден таки подзековни термин.”

Кед слово о наступе дзецинскей ґрупи керестурского Дому култури, репортере у спомнутим звиту так зазначели:

„Спочатку випатрало же керестурска публика уж засицена и же  дзецинску ґрупу Дома култури з Руского Керестура нє буду патриц вельо людзе. Алє кед ше до сали почали сходзиц и людзе котри уж раз патрели їх представу „Гайди”, було нам ясне же ше того вовтворкового вечара ма указац на бини цошка интересантне. Тото нам обецовал и авторитет режисерскей пари Любици и Йовґена Медєшових”

И наисце: по оцени репортерох за дзеци цо участвовали у тим фалаце остали лєм комплименти!

КЕРЕСТУРЦИ ЧЕКАЛИ КОЛЄСАРА

Похвално ше висловююци о представи Сербского народного театра з Нового Саду „Поп Чира и поп Спира” Стевана Сремца, репортере нє препущели нагоду спомнуц же  Керестурци  мали ридку нагоду  видзиц на своєй сцени и нашого ґлумца Драґена Колєсара у його каждодньовей роботи – ґлуми. Вон ше им очивисно и на тот завод попачел. А закончуюци тоту звиту, заключую: „Потребно найщирше подзековац новосадским ґлумцом же зоз свою програму збогацели репертоар и квалитет  єдней такей смотри аматеризма и професионализма яки, наздаваме ше, лапа коренї у Руским Керестуре.”

На концу свойого звиту репортере Ирина Гарди и Иван Бесерминї прекоментаровали наступ членох Українского народного театра зоз Пряшова, зоз словами:

„Драмски колектив Українского народного театру зоз Прешова нєшка у сали Дома култури у Руским Керестуре прикаже музичну комедию „Яр пришла до места”. Понеже тота комедия уж дата у Дюрдьове, Новим Садзе и Вуковаре, (8, 9. и 10. априла), можеме повесц же вибор музичней комедиї „Яр пришла до места” за Мемориял нє лєм же добри, алє и пополнєл пражнїну котра ше у нас уж давно чувствує.

Розшпиваносц, веселосц, здрави и весели гумор, танци, нєобчековани заплєти и розплєти, преврати, комични ситуациї и нєзґоди у тей музичней комедиї, наганяю патрачом слизи на очи од експресивного шмиху. А праве тото: веселосц, шпиванки и гумор, жадаю нашо патраче. И кед ше ґу тому доложи прекрасна ґлума шицких актерох комедиї,  суптилне провадзенє музики, вибор шпиванкох, сучасна сцена и костими, маска и безгришна режия, шлєбодно можеме повесц же нас Прешовчанє одушевели.”

ПРОГРАМА

У програми Меморияла участвовали рускокерестурски аматере зоз „Женїдбу”, шидянски аматере зоз „Ожалосцену фамилию”, члени дзецинскей драми при Доме култури у Руским Керестуре з фалатом „Гайди”, Аматерски Театер з Кули з „Єдловнїком”, Сербски народни театер з Нового Саду зос комедию „Поп Чира и поп Спира” як и прешовски Українски народни театер зоз музичну комедию „Яр пришла до места”.

(Предлужи ше)

ПОВЯЗАНИ ТЕКСТИ