РУСКИ КЕРЕСТУР – Керестурска парохия св. Миколая вчера преславела швето пророка Илиї. У церкви була ранша и вечарша Служба Божа, а у Водици на 10 годзин була Велька Служба Божа хтору служели домашнї парох о. Михайло Малацко и парох беркасовски о. Владимир Еделински, а споведал домашнї капелан о. Михайло Шанта.
У своєй казанї о. Малацко наглашел приклад твардей вири пророка Илиї.
– Правда Божа важнєйша як шицки правди того швета хтори, як и у Илийов час, ласкотаю уха зоз циґанствами и лєгкима ришенями за животни проблеми. У каждодньовим живоце можеме виберац медзи добрим и злим – опредзельме ше за любов, сочувствиє и пожертвовносц.
На концу Служби Божей опрез Лурдескей пещери священїки служели Молебен до Пресвятей Богородици и шпивали многолїтствиє вєдно з вирнима, хторих було у вельким чишлє.
