ВУКОВАР (РЕПУБЛИКА ГОРВАТСКА) – У орґанизаци Координациї рускей националней меншини Републики Горватскей (РГ), всоботу, 26. мая, у ткв. Ружичковей хижи, у Вуковаре, отримана Шветочна академия з нагоди Дня Руснацох у РГ.
По интованю гимни Републики Горватскей и Шветочней шпиванки Руснацох у РГ котри одшпивал хор Союзу Русинох РГ под дириґентску палїцу Агнети Тимко Мудри, присутних привитал и повинчовал Швето Борис Бучко, предсидатель Координациї рускей националней меншини РГ и предсидатель Ради рускей националней меншини Вуковарско-сримскей жупаниї. Висланїк крижевского владики кир Николи Кекича и заменїк владического викара за Славонию и Срим, о. Владимир Седлак.
Медзи визначнима госцами були и Представнїк рускей националней меншини Городу Заґребу, мр.сц. Ириней Мудри, Представнїца рускей националней меншини Осиєцко-бараньскей жупаниї, Агнетка Балатинац, предсидатель Ради рускей националней меншини општини Боґдановци, Владимир Дудаш, священїки з Вуковару, Райового Села и Петровцох, началнїца управного оддзелєня за културу городу Вуковару, Марина Секулич, предсидателька Союзу Русинох РГ, Дубравка Рашлянин, подпредсидатель Шветовей Ради Русинох, Миломир Шайтош, и числену делеґацию Руснацох зоз Сербиї на чолє з предсидательом Националного совиту Руснацох Славком Рацом. Директорка НВУ „Руске слово” Мартица Тамаш подаровала коло 70 кнїжки предсидательови Координациї Руснацох РГ, же би их дал на розполаганє до гевтих стредкох дзе найпотребнєйше.
През годзинову програму, шветочносц Дня Руснацох зоз шпиванками звелїчали КУД Руснацох з Осиєку, КУД „Осиф Костелник” з Вуковару, Дружтво „Руснак” з Петровцох, КД Руснацох з Винковцох, КД Руснацох Цвелфериї з Райового Села, КУД „Яким Гарди” з Петровцох и женска шпивацка ґрупа КУД-а „Яким Ґовля” з Миклошевцох. Драмску сценску миниятуру през стихи „Оцец и син” и „Селїдби”, барз успишно виведли Томислав Рац и Владимир Дудаш котрих на ґитари провадзел Ярослав Медєши, а стихи нєдавно упокоєней Любици Сеґеди Фалц, „Мойо коренї” гуторела Леся Мудри.
