БЕОҐРАД – Забрана нащивох пациєнтох у шпитальох нє будзе утаргнута потамаль покля ше будзе звекшовац число хорих од осипкох, гварел министер здравя Златибор Лончар.
Лончар наглашел же ше число хорих нєпреривно звекшує, же єст досц пациєнтох з компликациями, и же потераз було пейц смертельни случаї.
Министер замодлєл медиї же би були одвичательни и нє окончовали прицисок же би ше утаргло забрану нащивох, бо то єдина бариєра котра зопера ширенє хороти.
Лончар гварел же держава муши зробиц шицко же би ше зопарло ширенє осипкох.
Вон ище раз апеловал на родичох же би вакциновали свойо дзеци зоз ММР вакцину котра защицує од осипкох, бо то єдини способ же би ше епидемия застановела.
Од октобра прешлого року по нєшка у Сербиї реґистровани 2 838 случаї осипкох, указую податки Института за явне здравє Сербиї „Др Милан Йованович Батут”.