БЕОҐРАД – Приватни пензиї у Сербиї на концу септембра прешлого року уплацовали 188 694 хаснователє, цо 9,4 одсто з числа занятих у держави, обявела Народна банка Сербиї (НБС), а преноши Бета.
По податкох НБС о добродзечних пензийних фондох за треце тромешаче прешлого року, кажди пияти хаснователь член двох, лєбо и вецей добродзечних пензийних фондох, а штреднї винос акумулованих средствох на рахункох членох фондох бул дацо вецей од 194 000 динари.
Добродзечни пензийни фонди у трецим тромешачу 2016. року хасновательом виплацели 323,4 милиони дин., док нето уплацованя до фондох виношели 703,1 милион динари.
Хаснователє приватних пензийних фондох векшином хлопи (60 одсто), а штредня старосц хасновательох коло 45 роки. Найвецей хасновательох єст од 30 до 50 роки (коло 60 одсто), док старших од 53 роки єст коло 25 одсто.
У Сербиї дїлую штири дружтва за управянє, хтори управяю з маєтком седем добродзечних пензийних фондох.
Добродзечни пензийни фонди у нашей жеми почали робиц 2006. року. Найвекша часц маєтку тих фондох – 72,9 одсто – уложена до державних облиґацийох.