НОВИ САД – Покраїнска влада стреду, 7. юния, прилапела Предлог о ребалансу буджету АП Войводини за тот рок, по хторим покраїнски буджет будзе звекшани за коло 2,5 милиярди динари (за 3,8 одсто), односно будзе виношиц 66,1 милиярду динари.
Як сообщене з Покраїнскей влади, звекшанє буджету би мало буц унапрямене за капитални инвестициї у Войводини – до транспортсней инфраструктури коло 618 милиони динари, 423 милиони до инвестицийох у здравстве и социялней защити (за обнавянє обєктох и набявянє опреми), як и коло 370 милиони динари до образованя – за обнавянє обєктох предшколских установох и основних и штреднїх школох коло 320, а коло 50 милиони за адаптованє спортских теренох у школох.
Предложене же би ше за капитални инвестициї у польопривреди и защити животного штредку дополнююцо опредзелєло 252 милиони динари, за дальшу вибудов Науково-технолоґийного парку у Новим Садзе 110 милиони, за предлуженє реконструованя Народного театру у Суботици 112 милиони, а за потримовку проєкту „Нови Сад – Европска престолнїца култури 2021” 87 милиони динари.
Предлог о ребалансу буджету за тот рок прешлїдзени на розпатранє и прилапйованє до Скупштини АП Войводини.