ШИД – Одборнїки Скупштини општини (СО) Шид пияток, 8. септембра, прилапели Одлуку о вименкох и доплнєньох Одлуки о буджету, з хтору вкупни приходи утвердзени на милиярду 208 милиони 843 700 динари. Чечуца буджетна резерва тераз 12 милиони, а стаємна два милиони динари, так же вкупно опредзелєни средства виноша милиярду 194 милиони 843 700 динари. Ребаланс буджету бул нєобходни пре порядне финансованє шицких буджетних хасновательох.
Прилапени и звити о витворйованю буджету у першим полрочю 2017. року, дзе приходи були 393 милиони 631 347 динари, цо 38,25 одсто з планованих средствох, а у истим периодзе влонї витворєнє буджету було 32,80 одсто.
СО прилапела и Одлуку о максималним чишлє занатих на нєодредзени час у општинских орґанизацийних часцох и тераз тото число 449 занятих, принєшена Олдука о снованю месних заєднїцох, усоглашена з актуалнима законскима предписанями, як и Одлука о розпоредзованю средствох з буджетного Фонду за защиту и унапредзованє животного штредку.
На вимогу Општинскей ради, на дньови шор положени и точки о даваню согласноци на вименки Статута Заводу за урбанизем, потим на Програму дїлованя Центру за социялну роботу, як и ЯКП „Стандард“.