ШИД – Општинска рада (ОР) на вчерайшей схадзки прилапела Звити о роботи месних заєднїцох за прешли рок, як и Плани роботи и Финансийни плани за 2018. рок.
ОР тиж принєсла предлог Одлуки о менованю Дочасових целох у шицких месних заєднїцох на подручу општини, окрем у Вишнїчеве дзе мандат Совиту МЗ ище нє вишол, а задаток Дочасових целох будзе же би пририхтали отримованє виберанкох за нови Совити МЗ хтори буду на яр.
По словох Драґана Ґутича, члена ОР хтори на прес конференциї бешедовал з новинарами, на схадзки принєшена одлука о анґажованю екстерного ревизора, предложени кадрово пременки у општинским Совиту за здравє и Совиту за занятосц.
Значна одлука и же би хаснователє єднократней социялней пенєжней помоци убудуце тоту помоц одробели у явних роботох, а принєшена и одлука о розписованю явней оглашки за опредзельованє средствох спортским здруженьом на основи конкурса.
Вигласане и предкладанє же би у Предшколскей установи „Єлица Станивукович- Шиля“ и далєй робело предлужене пребуванє дзецох до 17 годзин, цо би ше финансовало з локалного буджету, алє и з других жридлох.