Припознаня добродзечним давательом креви

автор мар
850 Опатрене

НОВИ САД – З нагоди 14. юния – Шветового дня добродзечних давательох креви, городоначалнїк Нового Саду Милош Вучевич вчера приял длугорочних добродзечних давательох креви котри у прешлим року 50, 75 и 100 раз дали крев, як и колективи,  добитнїкох плакети „Широке шерцо“.

Мото тогорочного Шветового дня добродзечних давательох креви бул „Зроб дацо. Дай крев. Дай крев тераз. Давай крев поряднє“. У сотруднїцтве зоз Заводом за трансфузию креви Войводини и Червеним крижом Нового Саду тот датум означени на числених трибинох, шветочносцох и манифестацийох, а подзелєни и пропаґандни материял за промовованє добродзечного даваня креви.

– То героє нєшкайшого часу, котри зоз солидарносцу ратую чловечески животи. Основни циль наших активносцох же бизме фамелию даветельох креви преширйовали, а у 2016. року зме мали 2 400 перши даваня креви – наглашел секретар Червеного крижу Драґан Лазич и подзековал Городу на моцней потримовки їх роботи.

За 100 даваня креви плакету достали дзевецеро давательох креви, за 75 даваня 11, а за 50 даваня 19 давателє. Плакету „Широке шерцо“ за 2016 рок достали 9 колективи.

Присутних на приєму привитали и предсидатель Червеного крижу Нового Саду полковнїк др Братолюб Бркляча, директорка Заводу за трансфузию креви Войводини проф. др Радмила Йованович и Небойша Єлич спред наградзених давательох, котри и заняти у Заводзе за трансфузию креви, а дотера крев дал вецей як сто раз.

Шветови дзень добродзечних давательох креви утвердзела Шветова здравствена орґанизация на родзени дзень пренаходзача кревових ґрупох Карла Ландштайнера, и ма задаток же би ше у цалим швеце зоз синхронима манифестациями преславело и наглашело значносц милионох давательох креви котри добродзечнє, анонимно и без награди даваю крев, з чим ше кажди дзень виратує тисячи животи.

5-Krev-02

ПОВЯЗАНИ ТЕКСТИ