Toго року пре високи температури и сухе лєто шицки польопривредни култури дозрели скорей як звичайно. Суша найменєй начкодзела слунечнїку и парасти котри мали найвецей тей култури найлєпше прешли того року. Медзитим, сої и кукурици треба вельо вецей води, та дзепоєдни на тих културох у „минусу” и питанє же чи покрию свойо трошки укладаня.
Ламачка кукурици звичайно почина концом септембра, алє того року пре специфични хвильово обставини, парасти у Коцуре пачали ламац кукурицу уж на початку септембра. Мало єст тих котри можу буц задовольни з тим як кукурица зродзела, понеже кед и єст чутки, вони нє досцигли квалитет и велькосц яку могли мац у лєпших условийох, та ридко хтора чутка векша як длань.
МЕРКОВАЦ НА НАШЕНЄ И ГНОЙ
Силвестер Яким ше зоз польопривреду занїма вецей як 40 роки, та гвари ше було вшелїяк, и доброго заробку, алє и ситуацийох кед и попри роботи оставал длужни и мал утрати. Зоз вецейрочного искуства, по його думаню, треба хасновац домашнє нашенє котре ше ґенетски присподобело нашому поднєбю и странски штучни гної.
– Роками сом експериментовал як дойсц до доброго роду и прешвечел сом ше же з нашима штучнима гноями нєт розлики у урожаю. Робел сом так же сом до штирох шорох нє гноєл зоз штучним гнойом, до других штирох сом лєм кус „посолєл”, треци штири шори сом нормално загноєл, а до штриох шорох сом тельо положел же би рошлїна требала згориц. Медзитим, резултат бул таки же кукурица вшадзи була иста, нє було нїякей розлики. Кед сом тот експеримент повторел зоз данско-голандскима штучнима гноями достал сом резултат котри сом очековал и од теди лєм их хаснуєм – потолковал Силвестер Яким.
ШТИРИ ГОЛЬТИ ПОШЛИ НА СИЛАЖУ
Владимир Цап тей сезони кукурицу посадзел на 10 гольтох и за ньго тот рок барз подли и єдну часц кукурици дал за силажу, понеже вообще нє „вируцела” чутку.
– Зоз дзешец гольтох кукурици котри сом посадзел того року, аж штири гольти сом дал на силажу, понеже на нєй скоро вообще нє було чутки. Кед ґу тому додам же ми на трох гольтох хробак погубел досц кукурици, та сом мал три тони кукурици по гольту и на трох гольтох по два прикочи, вец можем залючиц же того року зоз кукурицу була катастрофа. Наздавам ше же ше таке горуце лєто и така суша нє повторя пошвидко – гварел Владимир Цап зоз Коцура.
Окрем ламачки кукурици, того року скорей як цо то звичайно и по календарске, почало и лупанє кукурици. У Коцуре єст три одкупни места на котрих мож придац кукурицу у зарну. То ОЗЗ „Класка” зоз Коцура, „Либела продукт ДОО” зоз Змаєва и „Фарм кооп” зоз Србобрану. Цена од 16,50 динари по 16,70 динари за кукурицу котра ма до 14 одсто влаги.
